Kgošigadi Lufuno o be a buša nageng ya Roswika. Kgošigadi Lufuno o be a na le botho.O be a le bohlale kudu.

Kgošigadi o be a swere batho ba Roswika ka moka ka go swana.Batho le bona ba be ba mo rata kudu.Maluṱa e be e le yo mongwe wa baeletši ba Kgošigadi Lufuno ba go tshepega.

Monna wa Maluṱa, Tshidino, o be a sa rate botho bja Kgošigadi Lufuno. O be a sa rate ka mo batho ba bego ba mo tumiša ka gona.O ile a re: “Ke eng se Lufuno a nago naso nna ke se naso? Nka kgona go buša go mo phala.”

Tšatši le lengwe, Kgošigadi Lufuno le Maluṱa ba be ba boledišana ka mokgwa wo mokaone wa go abela batho meetse.Ba be ba sa dumelelane ebile ba ngangišana.

Taba ye ya befediša Maluṱa. O rile go fihla gae, a leba go monna wa gagwe.A bolela a befetšwe a re, “Nna le Kgošigadi Lufuno re fapane mabapi le kabo ya meetse.”

Tshidino a ipotša a re, “Nna ge nka ba kgoši nka dira bokaone kudu.”A hlohleletša mosadi wa gagwe gore a befelelwe Kgošigadi.

Ka letšatši le le latelago, Tshidino a kgoboketša batho ba motse kopanong.A re go bona, “Re ka se ke ra bušwa ke mosadi. Nna ke tla ba kgoši ye kaone.”

Batho bao ba bego ba le kopanong ba nagana ka mantšu a Tshidino.Ba se kwane le yena.

Yo mongwe a re, “Kgošigadi o naganela batho. O agetše bana ba rena dikolo.”Yo mongwe a re, “Re na le mašemo, re a lema. Le gona Kgošigadi o re abela meetse ka moka ga rena. Ke moetapele wa go loka.

Motho wa boraro a tlaleletša, “Kgošigadi Lufuno o buša ka bohlale go phala babuši ba pele ga gagwe. Dikgoši tša dinaga tše dingwe di tla go yena go kgopela maele.”

Tshidino o rile go kwa se, a ya gae a befetšwe kudu.Maluṱa a re go yena, “Batho ba Roswika ba boletše. Wena amogela dikganyogo tša bona.”

E rile ge Kgošigadi a ekwa seo, a myemyela.Ga se a otle Tshidino ka ge a tseba gore o mo fentše. Batho ba tla dula ba thekga baetapele ba bona ge ba phela ka khutšo, katlego le lethabo.