Letsatsi la Bašwa
Zandile Malaza
Simangaliso Sibiya
Setswana
First paragraphs

——


Letsatsi la 16 Seetebosigo ke la boikhutso mo Aforika Borwa, ke Letsatsi la Bašwa.
-
Kanelo e, e ka ga hisitori ya letsatsi le, le gore go diragetseng ka lona ka 1976.
1
“A lo a itse gore go diragetseng ka Letsatsi la Bašwa ka 1976?” Nkoko a botsa ditlogolo tsa gagwe, Buhle le Vusi.
-
“Go diragetse hisitori ka la 16 Seetebosigo mo Soweto!” a ba bolelela.
2
“E ne e le moso wa la 16 Seetebosigo ka 1976. E ne e le letsatsi la me la bofelo la sekolo.
-
Letsatsi leo le fetotse hisitori,” nkoko a tswelela.
3
“Re ne re le baithuti go tswa dikolong tse di farologaneng tsa Soweto.
-
Re ne re ikaeletse go gwanta go tswa dikolong tsa rona go ya kwa Setadiamong sa Orlando. Re ne re ikaeletse go gwanta ka kagiso.”
4
“Lo ne lo gwantelang?” Buhle a botsa.
-
“Puso ya tlhaolele e ne e re pateletsa go ithuta ka seAforikanse. Re ne re le kgatlhanong le molao oo. Re ne re šakgetse tota!” Nkoko a tlhalosa.
5
“Re ne ra baya leoto fa fatshe go lokolola baithuti ba bantsho ba Aforika Borwa.
-
Re ne re batla thuto e e botoka, e e lekalekanang go MaAfori ka Borwa otlhe.”
6
“Jaanong ga diragalang?” Vusi a botsa.
-
“Re ne re ya go kopana kwa Setadiamong sa Orlando. Baithuti ba le bantsi ba ne ba tla. Go le boitumelo!” Nkoko o a gopola.
7
“Fa re ntse re gwanta, mapodisa a re tlhasela!
-
Ba latlhela digase tsa dikeledi. Dintšwa tsa bona tsa re tlhasela!
-
Re ne ra leka go ba ikgatholosa mme ra tswelela go tsamaya.”
8
“Jaanong ba simolola go thuntsha!
-
Go na le setshwantsho se se itsegeng se se neng sa gakgamatsa lefatshe.
-
Sa ga Hector Pieterson a tshwerwe ke tsala ya gagwe,” Nkoko a rialo ka kutlobotlhoko.
9
“Go fedile jang?” Buhle le Vusi ba botsa ba sebaseba.
-
“Ditshupetso tsa Soweto di ne tsa phatlhalala naga yotlhe. Baithuti ba bantsi le badiri ba ne ba tsaya karolo.
-
Batho go anama lefatshe ba etleetsa ditshupetso.”
10
“Ditshupetso tsa Soweto di ne di le botlhokwa mo go lwantsheng tlhaolele. Re ne ra bitsa letsatsi leo ‘Letsatsi la Soweto’. E ne ya nna la boikhutso ka 1995.”
-
“Ka dingwaga tsa bo 1990 go ne go le dipontsho tsa botaki tse di kgatlhisang ka ditshupetso tsa bašwa,” Nkoko a gopola.
11
“Ngwaga le ngwaga ka Letsatsi la Bašwa MaAforika Borwa a tlotlomatsa bašwa ba ba suleng ka ditshupetso tsa 1976.”
-
“Re gopola bašwa ba ba thusitseng go fedisa tlhaolele,” Nkoko a rialo.
12
“Ka Letsatsi la Bašwa go na le ditiragalo, dikopano le diketeko di le dintsi mo nageng.”
-
“Ga re a tshwanela go lebala hisitori ya naga,” Nkoko a rialo.
-
A nyenya mme a atla Buhle le Vusi.
13

——Dipotso


  1. Ke mang a anelang kgang, ke mang a reeditseng? O itse jang?
  2. Bana ba kwa Soweto ba ne ba gwantela kae ka 16 Seetebosigo 1976?
  3. Goreng ba ne ba gwantela kae?
  4. Letsatsi la 16 Seetebosigo le ntse leng la boikhutso, goreng?
14

——Dibuka tse di mo motseletseleng o


  • Letsatsi la Poelano
  • Letsatsi la Kgololesego
  • Letsatsi la Ngwaoboswa
  • Letsatsi la Ditshwanelo tsa Botho
  • Letsatsi la Basadi
  • Letsatsi la Badiri
  • Letsatsi la Bašwa
15

——


Kanelo e, e tlhamilwe le go kwalwa ka puo ya siSwati, jaaka karolo ya porojeke ya didirswa tsa go buisa ya Zenex Ulwazi Lwethu ya 2020.
16
Attribution CC BY
Your attribution should include the following:
Title: Letsatsi la Bašwa
Author/s: Zandile Malaza
Translator/s: Lorato Trok
Illustrator/s: Simangaliso Sibiya
Assurer/s: Dineo Moatshe, Opelo Thole
Language: Setswana

© Zenex Foundation - Saide 2024

CC BY includes the following elements:
 BY   – Credit must be given to the creator