Endvulo, bekunelijaha lelibitwa ngekutsi nguMosimane.Belingumuntfu lonemusa nalonelutsandvo. Belivame kujabulela kungcebeleka eceleni kwemfula.Ngalelinye lilanga ngesikhatsi Mosimane asemfuleni, wahlangana nenyoka.

“Sawubona nyoka,” kusho Mosimane.“Yebo Mnumzane,” kuphendvula inyoka.Inyoka yatjela Mosimane kutsi ingamenta abe yinjinga. Labekudzingeka nje kuphela kutsi Mosimane atfwale inyoka ngenhloko yakhe bese ayihambisa iye endzaweni leyitsandzako.Inyoka beyibonakala itsembekile.

Mosimane bekanebuntfu lobuhle. Wavuma kutfwala inyoka ngenhloko yakhe.Bawela umfula bobabili.

Mshiyaloya, inyoka yacela kutsi bobabili babe bangani, njengobe inyoka ingenabo bangani.Mosimane wavuma ngaphandle kwekungabata.Endleleni bahlangana neMnumzane Mphisi.

“Sanibonani bantfu bakitsi,” kusho imphisi.“Yebo Mnu. Mphisi,” kuphendvula Mosimane kanye nenyoka kanyekanye.“Nilibangisephi nine nobabili?” kubuta uMnu. Mphisi.“Ngiya lapho ngifuna kuya khona,” kuphendvula inyoka. UMnu. Mphisi wamangala.

“Ingabe utfola ikhokhelo lenhle yini ngalokutfwala inyoka enhloko yakho?” kubuta uMnu. Mphisi kuMosimane.Mosimane akashongo lutfo ngekutsi yini inyoka labeyimetsembise kona.Mosimane kanye nenyoka bachubeka neluhambo lwabo.

Ngesikhatsi seluhambo lwabo loludze ehlatsini, Mosimane wabese uyadzinwa.Bahlangana naMalume Jakalasi eceleni kwemtfunti wesihlahla.Malume Jakalasi wabuka inyoka labeyitigoce enhloko yemuntfu. Akazange awakholwe emehlo akhe.Wacala wahleka.

Inyoka yatsetsisa Malume Jakalasi yase itsi, “Uhlekani? Uyati yini kutsi kuhleka kungadala ingcabano!”“Mine kanye nenyoka sibangani labakhulu!” kusho Mosimane atjela Malume Jakalasi.Malume Jakalasi wacabanga sikhashana. Ngemva kwaloko wacala kukhuluma ngelivi lelipholile.

“Nyoka, yehla enhloko yami kute ngitokwati kuva kahle kutsi Malume Jakalasi utsini,” kusho Mosimane.Wachubeka, “Nyoka, ngikutfwale ngakuweta umfula waya mshiyaloya. Ngaphindze ngakutfwala kuze kube nyalo. Iphi inkhokhelo yami? Bengicabanga kutsi tsine sibangani.”

Malume Jakalasi wabuta, “Kantsi wena awati yini kutsi tinyoka atiketsembeki?”Inyoka yabona kutsi Mosimane sewutfukutsele yase iyanyombuluka yayongena ehlatsini.Mosimane waya ekhaya wase utjela bantfu ngendzaba yenyoka.Kuze kube nyalo, tinyoka atetsenjwa ngunobe ngubani.