Kgalekgale, go be go na le lesogana leo le bego le bitšwa Mosimane.E be e le motho wa go loka, wa lerato. O be a rata go yo iketla leribeng la noka.Ka letšatši le lengwe, ge Mosimane a be a le nokeng, o ile a kopana le noga.

“Dumela noga,” Mosimane a realo.“Dumela mohlomphegi,” noga ya araba.Noga ya botša Mosimane gore e ka mo dira mohumi. Mosimane o be a swanetše go rwala noga hlogong ya gagwe a e iše mo e nyakago go ya gona.Noga e be e bonala e tshepagala.

Mosimane o be a na le botho. A dumela go rwala noga hlogong.Ba ile ba tshela noka mmogo.

Ge ba fihla ka mošola wa noka, noga ya kgopela gore ba be bagwera, ka ge yona e se na bagwera.Mosimane a dumela ntle le go dikadika.Ge ba le tseleng ba kopana le Phiri.

“Dumelang batho ba ka,” Phiri ya ba bitša bjalo.“Dumela Phiri,” Mosimane le noga ba araba ka nako e tee.“Le ya kae?” Phiri ya botšiša.“Re ya mo ke ratago go ya gona,” noga ya araba. Phiri a makala.

“Na o hwetša moputso wo mobotse morago ga go rwala noga hlogong?” Phiri ya botšiša Mosimane.Mosimane ga se a bolela seo noga e mo tshepišitšego sona.Mosimane le noga ba tšwela pele ka leeto la bona.

Leetong la bona le letelele, Mosimane a thoma go lapa.Ba kopane le Phukubje kgauswi le mohlare wa moriti wo mobosana.Phukubje ya lebelela noga ge e kudupane hlogong ya monna. Ga se ya tshepa se a se bonago. Ya thoma go sega.

Noga ya kgadimola Phukubje ya re,“Gobaneng o sega? Lesego le ka hlola dintwa!”“Nna le noga re bagwera ba potego!” Mosimane a botša Phukubje.Phukubje a nagana sebakanyana. Morago a bolelela fase.

“Noga, fologa hlogong ya ka gore ke kgone go kwa Phukubje gabotse,” Mosimane a realo.A tšwela pele, “Noga, ke go rwele ka go tshediša noka. Ke go fihlišitše bokgole bjo. O kae moputso wa ka? Ke be ke gopola gore re bagwera.”

Phukubje a botšiša, “Ga o tsebe gore dinoga ga di tshepagale?”Noga ya bona gore Mosimane o huduegile gomme ya gogobela ka sethokgweng.Mosimane o ile a ya gae a yo botša batho ka ga noga.Go fihla gabjale, batho ga ba tshepe dinoga.