John Kani, ucale e-Snake Pit wagcina ngekuba yiNkhosi
Ndivhuho Mutsila
Vusi Malindi
Siswati
Longer paragraphs

——


Lencwadzi yetindzaba imayelana naBonisile John Kani.
-
Watalwa nga-1943 eNew Brighton, edolobheni laseGqeberha. Kusukela asemncane, bekatsandza kulingisa kanye netindzaba.
-
Lomfana waseMphumalanga Kapa wakhula waba ngumlingisi, ngumbhali, kanye nemcondzisi lodvumile emhlabeni!
1
Gogo waJohn nguye lowametayelanisa nemhlaba wetindzaba.
-
Bekamcocela tinganekwane letinyenti futsi wamfundzisa nendlela yekucamba tindzaba. Njalo kusihlwa, ngaphambi kwekuyolala, gogo waJohn bekamcocela tindzaba.
-
Bekutindzaba letesabisanako letimayelana nemtsakatsi lonematinyo lomadze kanye netinzipho letindze!
2
Ngalelinye lilanga, gogo waJohn wamcela kutsi amcocele indzaba.
-
Wacala ngekutsi, “Kwesukasukela, bekunesalukati labesihlale njalo sifuna kutsi bantfwana basicocele tindzaba!”
-
John wakujabulela kucoca tindzaba. Wacala kulingisela imidlalo esikolweni.
-
Umdlalo yindzaba ledlalwa balingisi.
3
Balingisi bangantjintja emavi abo futsi batente bantfu labehlukehlukene. Badlala tonkhe tinhlobo tebalingisi emdlalweni nakumafilimu.
-
Ngesikhatsi asemncane John, bekabukela emafilimu kanye nebangani bakhe labebangasicondzi kahle siNgisi.
-
John bekatolikela bangani bakhe tinkhulumiswano tesiNgisi, letidlalwa balingisi labehlukehlukene.
4
Ngemuva kwekucedza Sikolwa Semabanga Laphakeme, John wasebenta efemini. Waphindze wajoyina licembu lebalingisi, labebasebenta kuleminye imisebenti. Labanyenti babo bekubalingisi Labamnyama.
-
John watsi: “Besingetulu nje kwekuba licembu ledrama. Besingemasotja esiteji. Besisebentisa likhono lekukhuluma ngalokumelene netintfo letimbi.”
5
Ngaleso sikhatsi, John waba ngumngani lomkhulu wemlingisi Winston Ntshona. Bacala kwenta imidlalo ndzawonye.
-
Baba secenjini ledrama lelibitwa ngekutsiwa yi-Serpent Player.
-
Lelicembu lacala kudlala emgodzini wetinyoko longenalutfo wase-zoo yaseGqeberha. Yingako bebatibita ngekutsi ngema-Serpent Player.
6
Ema-Serpent Player ahlanganiswa ngu-Athol Fugard, lomunye umlingisi kanye nembhali. Athol, John kanye naWinston basebenta ndzawonye kute bente imidlalo lemibili lebalulekile ekucaleni kwema-1970.
-
Lemidlalo beyimayelana nemiphumela yelubandlululo kubantfu Labamnyama.
-
Lemidlalo beyibitwa ngekutsiwa yi-‘Sizwe Banzi is Dead’ kanye ne-‘The Island’.
7
I-‘Sizwe Banzi is Dead’ imayelana nemitsetfo yemapasi, ngesikhatsi bantfu Labamnyama bekudzingeka baphatse bomatisi lababitwa ngekutsiwa bodomupasi.Sizwe Banzi bekangakwati kusebenta ngobe angenayo imvume kudomupasi wakhe.
-
I-‘The Island’ imayelana nemadvodza lamabili laseRobben Island, ejele lelidvumile letiboshwa tepolitiki.
8
Nga-1975 eNew York, John naWinston bawina ema-‘Tony Award’ nge-‘Sizwe Banzi is Dead’ nange-‘The Island’.
-
I-Tony Award ngumklomelo lobalulekile emaveni emhlaba wekuhlonipha kudlala enkhundleni yemidlalo yasesiteji. (Imidlalo idlalwa enkhundeni yemidlalo yasesiteji).
-
John wacala kusebenta nemcondzisi wenkhundla yemidlalo yasesiteji lobitwa ngekutsiwa nguBarney Simon.
9
John naBarney becalisa i-Market Theatre Laboratory, leyincenye ye-Market Theatre yaseGoli.
-
Lelabhorethri icecesha bantfu labafuna kusebenta enkhundleni yemidlalo yasesiteji, ikakhulukati ngekulingisa.
-
Nga-2014, i-Market Theatre yashintja ligama lenkhundla yayo lenkhulu lase liba yi-John Kani Theatre, ngenhloso yekumhlonipha.
10
Nga-2002, John watibhalela umdlalo wakhe wekucala. Bewubitwa ngekutsiwa ‘Nothing but the Truth’ futsi ususelwa kulokwenteka eNingizimu Afrika ngemuva kwelubandlululo.
-
Eminyakeni leyengcile, bekadlala tinhlobo letinyenti temidlalo, kuhlanganise nalotsi ‘Othello’ waWilliam Shakespeare, kanye nalotsi ‘Miss Julie’ wa-August Strindberg.
11
John waphindze wadlala eluchungechungeni lwemidlalo ye-TV kanye nakumafilimu.
-
Nga-2016, wadlala ku‘King T’Chaka of Wakanda’ efilimini lelitsi ‘Captain America: Civil War’.
-
Eminyakeni lemibili kamuva, wacala kudlala kuKing of wakanda efilimini lelitsi ‘Black Panther’. John wasebentisa siXhosa njengelulimi lwaseWakanda!
12
Nga-2005, John waklonyeliswa nge-The Order of Ikhamanga nguHulumende waseNingizimu Afrika.
-
Lomklomelo uhlonipha imphumelelo emisebentini yekucamba, kungaba senkhundleni yemidlalo yasesiteji, imibhalo, umculo, noma buntsatseli.
-
Lamuhla, John usabhala, usalingisa, futsi usavelele etinkhundleni temdlalo wasesiteji.
13

——Naku lokushiwo nguJohn Kani mayelana nemphumelelo yakhe:


  1. “Inkhundla yemidlalo yasesiteji, kubhala kanye nekudlala kungente ngaveta lokwenteka ngekhatsi kimi, ekujuleni kwemphefumulo wami.”
  2. Ucabanga kutsi usho kutsni ngaloku? Coca nalabanye ngaloku.
14

——Imibuto


  1. Ngubani lowakhutsata John Kani kutsi acoce tindzaba? Kungani usho kanjalo?
  2. Chaza kutsi labantfu laba yini labayentako enkhundleni yemdlalo wasesiteji: umlingisi, umbhali, umcondzisi.
  3. Lasuselwa kuphi ligama lelicembu ledrama lelibitwa ngekutsiwa yi-‘The Serpent Players’?
  4. Tfola kutsi likhona yini licembu lasenkhundleni yemidlalo yasesiteji emmangweni wakini.
15

——


Lencwadzi yetindzaba icanjwe futsi yabhalwa ngeTshivenḓa, njengencenye yetintfo tekufundza teZenex Ulwazi Lwethu nga-2021.
16
Attribution CC BY
Your attribution should include the following:
Title: John Kani, ucale e-Snake Pit wagcina ngekuba yiNkhosi
Author/s: Ndivhuho Mutsila
Translator/s: Mduduzi Benjie Shongwe
Illustrator/s: Vusi Malindi
Assurer/s: Simangele Khoza
Language: Siswati

© Zenex Foundation - Saide 2024

CC BY includes the following elements:
 BY   – Credit must be given to the creator