UJohn Kani, usuka emGodini weNyoka ugcina ayiKosi
Ndivhuho Mutsila
Vusi Malindi
isiNdebele
Longer paragraphs

——


Indatjana esencwadini le ikhuluma ngoBonisile John Kani.
-
Wabelethwa ngomnyaka we-1943 e-New Brighton, edorobheni leGqeberha. Wathanda ukulingisa neendatjana kusukela ebuncanini bakhe.
-
Umsanyana obuya e-Eastern Cape lo, wakhula waba mlingisi, mtloli nomnqophisi odume khulu ephasini mazombe!
1
Ugogwakhe kaJohn wamfaka ephasini leendatjana.
-
Wamdembela iinganekwana ezinengi begodu wamfundisa nokubumba iindatjana.
-
Qobe ntambama ngaphambi kobana bayokulala, ugogwakhe bekamcocela iindatjana.
-
Bekuziindatjana ezithusako ezikhuluma ngomloyi onamazinyo amade namazipho amade!
2
Ngelinye ilanga ugogwakhe wabawa uJohn bonyana amcocele indatjana.
-
UJohn wathoma ngokuthi, “Kwasukasukela! Kade kwakunogogo omdala owabe athanda bona abantwana bamcocele iindatjana!”
-
UJohn bekakuthabela ukucoca iindatjana. Wathoma ukulingisa nabekasafunda ekulisa.
-
Umdlalo yindatjana edlalwa balingisi.
3
Abalingisi bangatjhugulula amaphimbo benze sengathi bangabanye abantu abahlukileko. Badlala yoke imihlobo yabalingisi emidlalweni nemafilimini.
-
Lokha uJohn nakasesemncani, bekabukela amafilimu nabangani bakhe egade bangazwisisi i-English kuhle.
-
UJohn bekatologela abangani bakhe ikulumo-pendulwano ye-English, adlala iindima ezihlukahlukeneko.
4
Ngemuva kokuqeda isikolo samabanga aphezulu, uJohn wasebenza efemeni.
-
Wajoyina nesiqhema sabalingisi, ebebasebenza kweminye imisebenzi. Inengi labo kwakubalingisi babantu abaNzima.
-
UJohn wathi, “Besingasiso isiqhema sedrama kwaphela. Besimasotja esiteji. Sisebenzise ubukghwari ukukhuluma ngezinto ezingakalungi.”
5
Ngalesisikhathi uJohn waba mngani omkhulu nomlingisi uWinston Ntshona. Bathoma ukubumba imidlalo baboke.
-
Bebasesiqhemeni sedrama esasibizwa ama-Serpent Players.
-
Isiqhemesi umdlalo waso wokuthoma sawenzela emgodini weenyoka onganalitho esithameleni seenlwana seGqeberha.
-
Ngikho nje bazibiza ngokuthi ma-Serpent Players.
6
Umdlalo wesiqhema sama-Serpent Players wahlelwa ngu-Athol Fugard, owabe angomunye umlingisi begodu amtloli.
-
U-Athol, uJohn noWinston basebenza boke babumba imidlalo emibili eqakathekileko ekuthomeni kweminyaka yabo-1970.
-
Imidlalo yabe ikhuluma ngemiphumela yebandlululo ebantwini abaNzima.
-
Imidlalo ibizwa i-Sizwe Banzi is Dead ne-The Island.
7
I-Sizwe Banzi is Dead ikhuluma ngemithetho yamadompasi, lokha abantu abanzima nebebakatelelwa ukobana bakhambe nabomazisi ebebabizwa amadompasi.
-
USizwe Banzi angeze akghone ukusebenza ngombana bekangakghoni ukuthola iphemidi yedompasi yakhe.
-
Isihlengele sikhuluma ngamadoda amabili esihlengeleni se-Robben Island, ejele eyayidume khulu yeembotjhwa zepolotiki.
8
Ngomnyaka we-1975 e-New York, uJohn banoWinston bathumba abonongorwana bama-Tony Awards nge-Sizwe Banzi Is Dead ne-The Island.
-
Unongorwana we-Tony Award ungunongorwana oqakathekileko weentjhabatjhaba wokwenza umsebenzi omuhle etiyetha. (Imidlalo idlalelwa etiyetha.)
-
Ngomnyaka we-1977, uJohn wathoma ukusebenza nomnqophisi wetiyetha ibizo lakhe okunguBarney Simon.
9
UJohn banoBarney bathoma iLabhorethri yeMarket Theatre, eyingcenye yeMarket Theatre ngeJwanasbhege.
-
Ilabhorethri ibandula abantu abafuna ukusebenza etiyetha, khulukhu labo abafuna ukuba balingisi.
-
Ngomnyaka we-2014, i-Market Theatre yatjhugulula ibizo lendawayo ekulu laba yi-John Kani Theatre, lokhu yakwenzela ukumhlonipha.
10
Ngomnyaka we-2002, uJohn wazitlolela yena umdlalo wakhe wokuthoma. Wona-ke ubizwa ngokuthiwa yi ‘Nothing but the Truth’ wadlalwa eSewula Afrika ngemuva kobana ibandlululo liphele.
-
Eminyakeni eminengi, bekadlala emihlobeni eminengi yemidlalo, kufakwe hlangana nomdlalo othi Othello otlolwe ngu-William Shakespeare, nalo othi Miss Julie otlolwe ngu-August Strindberg.
11
UJohn ube mlingisi elungelungeni lemidlalo ye-TV nakumafilimu.
-
Ngomnyaka we-2016, wadlala njengo-King T’Chaka of Wakanda efilimini ethi Captain America: Civil War.
-
Ngemuva kweminyaka emibili, wadlala godu emdlalweni waba ngu-King of Wakanda efilimini i-Black Panther.
-
UJohn wafaka ilimi lesiXhosa njengelimi elikhulunywa eWakanda!
12
Ngomnyaka we- 2005, uJohn watlonyeliswa mBuso weSewula Afrika nge-The Order of Ikhamanga.
-
Unongorwana lo ungewalabo abenze umsebenzi omuhle khulu emikhakheni yetiyetha, kwezemitlolo, emvumeni namkha emsebenzini wokutlolela iimbikiindaba.
-
Nanamhlanjesi uJohn usatlola, usalingisa begodu usathumba ephasini letiyetha.
13

——Nakhu lokho uJohn Kani akutjhoko ngekghono lakhe:


  1. “Itiyetha, ukutlola nokudlala kungenze ngakghona ukulemuka lokho okwenzekako kimi, emmoyeni wami.”
  2. Ucabanga bona utjho ukuthini? Khuluma ngalokhu nabanye.
14

——Imibuzo


  1. Ngubani owakhuthaza uJohn Kani ukobana acoce iindatjana? Kubayini utjho njalo?
  2. Hlathulula bona abantwaba benza ini etiyetha: umlingisi, umtloli, umnqophisi.
  3. Ngiliphi ibizo lokuthoma lesiqhema somdlalo we-The Serpent Players?
  4. Akhese uthole bona ingabe sikhona isiqhema setiyetha emphakathini wekhenu.
  5. Abalingisi baduma njani emabizelweni wabo?
  6. Uthini umbono wakho ngomsebenzi wabalingisi nabavumi?
  7. U-John Kani uthi, “Sisebenzisa ubugwali ukobana sikhulume sihlabe izinto ezimbi.” Ingabe ngiziphi izinto ekungenzeka bakhulume ngazo bazihlaba?
  8. Ucabanga bona kubayini abantu basebenzisa ubugwali ukobana bakhulume ngezinto ezimbi emphakathini?
15

——


Indatjana esencwadini le yabunjwa begodu yatlolwa ngelimi leTshivenda, njengengcenye yephrojekthi yamamatheriyali wokufunda we-Zenex Ulwazi Lwethu we-2021.
16
Attribution CC BY
Your attribution should include the following:
Title: UJohn Kani, usuka emGodini weNyoka ugcina ayiKosi
Author/s: Ndivhuho Mutsila
Translator/s: Sponono Mahlangu
Illustrator/s: Vusi Malindi
Assurer/s: William Jiyana
Language: isiNdebele

© Zenex Foundation - Saide 2025

CC BY includes the following elements:
 BY   – Credit must be given to the creator