Kadzeni, endzaweni lesetintsabeni taseMbhokota, bekuphila sidzandzane lesibitwa ngekutsiwa nguTsakani.Tsakani bekangenabo bangani, ngako bekahlala njalo anesitunge.Bekafuna umuntfu langabumba naye emathoyisi elubumba, kute bente emabhodo, tinkomishi, kanye netinkhomo. Bekungekho umuntfu labengadlala naye.

Wakubona loku Gogo wase uyacabanga, “Tsakani udlala ngematje onkhe malanga. Loku akusikahle. Likhona licebo lengitalenta.Gogo bekakwati kubata tigodvo. Bekakwati kwenta imifanekiso yetindlovu letinkhulu, nemifanekiso yebantfu labadvumile.Gogo bekenta imifanekiso yayo yonkhe intfo langayicabanga.

Ngalesikhatsi Tsakani amatasatasa adlala ngematje, Gogo abenta umdoli wesigodvo.Lomdoli wesigodvo bewungahlala futsi uhambe, kepha kuphela nangabe usedvute naTsakani.“Gogo, unguchwepheshe,” kusho Tsakani ngenjabulo lenkhulu ngesikhatsi abona umdoli.

Gogo washiya Tsakani nemadoli wesigodvo ngesikhatsi yena asahamba.Tsakani wakujabulela kakhulu kudlala ngamdoli wesigodvo. Kepha masinyane, waphindze waba nesitunge.Mdoli bewukwati kuhlala nekuhamba kuphela, kepha bewungakwati kukhuluma. Bekute umuntfu langakhuluma naye.

Ngako-ke, Gogo waphindze wenta lomunye umdoli lotawukwati kuhamba, kuhlala, kanye nekukhuluma.Tsakani wajabula kakhulu. Waze wagidza ngenca yenjabulo. Watsi, “Gogo, unguchwepheshe, ngijabule kakhulu.”Wadlala nawo kwate kwashona lilanga.

Kepha umdoli wesigodvo bewungakwati kudansa, kantsi Tsakani bekatsandza kudansa.Bekatsandza kudansa umdanso wekumkhombisa injabulo, umdanso wekuncoba, newe-xibelani.Bekafuna kujika abheke lena nale, hhayi yedvwa, kepha nemngani wakhe wesigodvo. Bekute lomunye langagidza naye.

Gogo bekangenta nobe nguyiphi intfo, ngelubumba kanye nangesigodvo.Wenta lomunye umdoli lomuhle ngesigodvo, lofake buhlalu kanye nemasongo/nemabhengela, kantsi futsi lomdoli bewugcoke xibelani.Lomdoli wesigodvo bewumuhle kakhulu. Bewukwati kuhamba, kuhlala, kukhuluma, kanye nekudansa.

Umdoli naTsakane bebalalela tingoma, badanse kanye kanye.Kusukela ngalelolanga nangabe angakayi esikolweni, Tsakani bekadlala ngemidoli yesigodvo lebekayentelwe nguGogo.Tsakani akamange aphindze abe nesitunge.

Watsi Gogo angabona kutsi Tsakani sewujabule kangaka, wentela umntfwana ngamunye endzaweni umdoli wesigodvo.Waphindze futsi wabata imifanekiso yesigodvo leminyenti yekuhlobisa.Umhlaba wonkhe ungabona umsebenti wetandla lomuhle waGogo.