Kgalekgale, motseng wa dithabeng wa Mbhokota, go be go dula mosetsanyana wa go bitšwa Tsakani.Tsakani o be a se na bagwera, ebile a lewa ke bodutu.O be a nyaka motho yo a ka bopago le yena dibapadišwa, dipitša, dikomiki le dikgomo tša letsopa. Go be go se na yoo a ka ralokago le yena.

Koko o lemogile seo gomme a nagana: “Tsakani o raloka ka maswikana ka mehla. Taba ye ga se ya loka. Ke tla loga leano.”Koko o kgona go betla kota. O kgona go betla ditlou tše dikgolo le batho ba go tuma.O betla dilo ka moka tšeo a di gopolago.

Koko o be a le gare a betla popi mola Tsakani a raloka ka maswikana.Popi e be e kgona go dula le go sepela, efela ge e le hleng ga Tsakani.“Koko, o na le bokgoni kudu,” Tsakani a bolela ka lethabo ge a bona popi.

Koko o ile a tlogela Tsakani le popi ya kota ge a eya leeto.Tsakani o be a thabišitšwe ke go raloka ka popi. E se kgale, ya se sa mo kgahla.Popi e be e kgona go dula le go sepela, efela e sa bolele. Go be go se na yo a ka bolelago le yena.

Koko a betla popi ye nngwe ya go kgona go dula, go sepela le go bolela.Tsakani o be a thabile kudu, a ba a bina. “Koko, o na le bokgoni kudu ebile ke thabile go feta.” A realo Tsakani.Ba raloka mmogo go fihlela letšatši le dikela.

Popi ya kota e be e sa kgone go bina, mola Tsakani a rata go bina.O be a rata go bina ka lethabo, mmino wa xibelani.O be a nyaka gore yena le popi ya gagwe ba hwidinyegele ka mo le ka mola. Go be go se na yo a ka binago le yena.

Koko o be a kgona go dira dilo ka moka, ka letsopa le ka kota.O betlile popi ye nngwe ye botsana, a e apeša dipheta le maseka, gammogo le xibelani.Popi ya kota ya mebalabala e be e kgona go sepela, go dula, go bolela le go bina.

Tsakani le popi ya gagwe ba theeletša mmino, ba ba ba bina mmogo.Go tloga lona letšatšing leo, ge Tsakani a se sekolong, o be a raloka le dipopi tša gagwe tša dikota tšeo Kokwani a mmetletšego tšona.Tsakani o be a se sa lewa ke bodutu bjale.

Koko o rile go lemoga ka mo Tsakani a thabilego ka gona, a betlela bana ka moka ba mo motseng dipopi tša kota.A ba a dira dibetlwa tše dintši tša go kgabiša ka kota.Lefase ka moka le ile la bona mošomo wo mobotse wa matsogo a Kokwani.