Fa Kgothatso a le monnye, dingaka di ne tsa mo dira karo, mme a kgaolwa leoto la gagwe la molema. O ne a dirisa leoto la polasetiki.Bana ba bangwe ba ne ba sa rate go tshameka le ena, ka ntlha ya bogole jwa gagwe.Fela mmaagwe, o ne a mo tsaya jaaka ngwana yo o itekanetseng. O ne a mo neela ditirwana tse di jaaka go tlhatswa dijana.

Mmaagwe Kgothatso o ne a mo isa kwa sekolong se se bidiwang Helen Franz Special School. Se ke sekolo sa bana ba ba nang le bogole.Ke kwa sekolong se, a itshupileng gore ke naletsana ya metshameko.Mo sekolong, o ne a tsenela metshameko ya metantsho ya Ballroom le ya Latin America.

Mongwe wa barutabana ba ga Kgothatso, o ne a mo tlhopha go emela sekolo sa bona kwa kampeng ya thenese, kwa Gauteng.Kgothatso o ne a ise a tshameke thenese!Kgothatso a re, “Ke ne ka tshwanela go tshameka thenese, gonne ke rutilwe go tlotla batho ba bagolo.”

Kgothatso o tshamekile ka matsetseleko kwa kampeng ya thenese. Se e nnile tshimologo ya loeto lwa gagwe, go nna motshameki wa maemogodimo wa thenese ya setuloteti mo lefatsheng ka bophara.O amogetse kabo ya setuloteti le ditshamekisi dingwe tsa thenese.O tla nna yo mongwe wa Ma Aforika borwa a a kwa godimo, a basadi ba bogole mo metshamekong.

Kgothatso o simolotse go tsenela dikgaisano tsa thenese ya setuloteti go ralala lefatshe.O fentse dikgaisano tsa kwa Belgium le Switzerland. Thonamente ya thenese ya kwa Swiss e nnile kgaisano eo a e ratileng go gaisa.Mo Aforika Borwa, o tlotlomaditswe gararo jaaka moparalimpiki wa mosadi wa ngwaga mo metshamekong.

Ka ngwaga wa 2013 le 2014, one a tsaya karolo mo dithonamenteng tsa Australia, France le AmerikaO tshamekile thenese mo disenyeleng a le nosi, fa mo didabolong a ne a na le motshameki yo mongwe.

Kgothatso gape o tsenetse kgaisano ya metshameko ya diparalimpiki, eo e leng metshameko ya diolimpiki ya batshameki ba bogole.Go ikatisetsa dikgaisano tse go ne go le thata, fela Kgothatso ga a ka a nyema moko.O nnile leloko la komiti ya diparalimpiki tsa Aforika Borwa tsa selemo, ka ngwaga wa 2008, 2012 le 2016.

Kgothatso o dirile ka natla mo dithutong tsa gagwe. O tsene kwa Yunibesithing ya Venda koo o ithutetseng dikerii ya tsa Tlhabologo, Metshameko le Saense.Kwa Yunibesithing, motshameko wa thenese ya setuloteti, e ne e le ona fela, o o neng o tshamekiwa ke batshameki ba ba nang le bogole.

Wimbledon e kwa Engelane. Ke ko lebaleng le le itsegeng la bogologolo la bojang jwa thenese, kwa go tshwarelwang dikgaisano tsa ngwaga le ngwaga.Ka ngwaga wa 2018, Kgothatso o ne a nna MoAforika Borwa wa ntlha wa mosadi go fitlhelela makgaolakgang kwa Wimbledon.

Kgothatso o ne a tshwanetse go tsaya loeto go ya kwa Engelane, go tsenela thonamente ya Wimbledon.Fela, go ne go sena matlole go duelela sefofane le borobalo. Kgothatso o ne a tshwenyegile, gonne a akanya fa a ka se kgone go tsaya loeto, ka ntlha ya tlhokego ya matlole.Ka lesego, o ne a fitlhela tshegetso go tswa go setlamo sa basadi sa dikgwebo!

Wimbledon e ne e le thonamemte ya Grand Slam ya bone, e Kgothatso o neng a e tsenela mo ngwageng wa 2018.Grand Slam ke dikgaisano di le nne tsa maemogodimo mo dikgaisanong tsa motshameko wa thenese.O nnile motshameki wa ntlha wa MoAforika, mo motshamekong wa thenese ya setuloteti, go fitlhelela thonamente di le nne tsa Grand Slam mo ngwageng o le mongwe.

Mo godimo ga diphitlhelelo tsa gagwe, Kgothatso o tswelela go thusa batshameki bao ba nang le bogole.O bontsha batho gore o ka nna sengwe le sengwe mo botshelong, o ntse o na le bogole.