Ho no vhuya ha vha na musidzana we a vha a tshi pfi Maṱodzi.O vha a tshi dzula na mme awe na makhulu wawe.

Ḽiṅwe ḓuvha, mme a Maṱodzi vho mu ruma uri a ise mulaedza ha mme muhulu wawe kha muṅwe muvhundu.“A tshimbile nga nḓila ine ra i shumisa tshifhinga tshoṱhe,” ndi mme a Maṱodzi vha tshi mu humbudza.

Maṱodzi a shumisa nḓila ine a i ḓivha u ya ha mme muhulu wawe, a isa mulaedza.Musi e nḓilani i vhuyaho hayani a pfa ipfi ḽi tshi ri, “Ndi khou humbela thuso.”

A tshi ri hasha maṱo a vhona mufumakadzi o eḓelaho tsini na bada.A lumelisa vhenevho mufumakadzi nahone a vhudzisa, “Ndi ngani vho eḓela hafha?”

Mufumakadzi vha fhindula, “Ndo fhelelwa nga nungo nahone ndi khou lwala, ndi kule na hayani.Maṱodzi a vha pfela vhuṱungu.

A vha vhudza uri, “Ndi ḓo vha isa hayani ha hashu ngauri ndi tsini.”Maṱodzi a thusa onoyo mufumakadzi uri a ime. Vha tshimbila nga zwiṱuku nga zwiṱuku vha vhuya vha swika.

Maṱodzi, mme awe na makhulu vha ṱhogomela onoyo mufumakadzi u swikela a tshi fhola.

Mufumakadzi a vha livhuwa nga maanḓa nge vha mu ṱhogomela.O khoḓa Maṱodzi nga tshivhindi na lufuno zwe a zwi sumbedza.

Mufumakadzi a vhudza Maṱodzi na muṱa wawe uri, “Ndi nga si hangwe zwe vha nnyitela zwone.Nga murahu ha maḓuvha mararu, vha ambe zwithu zwivhili zwine vha zwi tama.”

Nga murahu ha maḓuvha mararu, Maṱodzi, mme awe na makhulu vha amba zwithu zwivhili zwine vha zwi tama.Lutamo lwavho lwa u thoma lwo vha nnḓu yavhuḓi.

Lutamo lwa vhuvhili lwo vha u vha na ḓaka tsini na nnḓu uri vha sa tsha reḓa khuni.Zwoṱhe zwe vha zwi humbela zwa mbo ḓi itea sa zwe uḽa mufumakadzi a amba.

Maṱodzi na muṱa wa hawe vha dzula vho takala nga hu sa fheli nḓuni yavho yo nakaho i re ḓakani.Ndi u fa ha lungano.