Khomphyutha dza Tshilidzi Marwala dza vhuṱali
Ndivhuho Mutsila
Thulisile Shongwe
Tshivenḓa
Longer paragraphs

——


Tshiṱori itshi tshi amba nga Tshilidzi Marwala.
-
Ndi Rasaintsi wa Khomphyutha na Muinzhiniara wa Mekhenikhaḽa wa Afrika Tshipembe.
-
Hetshi ndi tshiṱori tshi no amba nga Tshilidzi wa Duthuni we a fhedza o vha muḓivhi wa zwa Saintsi na Thekhinoḽodzhi ḽifhasini ḽoṱhe.
1
Tshilidzi Marwala o bebwa kusini kwa Duthuni, Limpopo. Tshilidzi o aluswa nga vhabebi vhawe na makhulu wawe Vho Tshianeo.
-
Vho Tshianeo vho vha vhe muvhumbi wa khali. Kuvhumbelwe kwa khali dzavho dza sialala kwo sumbedza vhuinzhiniara ha mupo wone uṋe.
2
Vhuinzhiniara ndi saintsi ya u sika na u vhumba zwithu, sa mitshini na zwifhaṱo.
-
Vho Tshianeo vho vha vha tshi ḓivha vhuinzhiniara ha u vhumba khali dza Tshivenḓa.
-
Tshilidzi o takadzwa nga u vhona makhulu wawe vha tshi vhumba khali na u vha thusa u vhumba khali.
3
Vho vha vha tshi thoma nga u ita tshitendeledzi tsha tshiraho tsha khali.
-
Vha kona u phaphelela ḽiṅwe vumba vha tshi vhumba matungo ayo.
-
Makhulu Vho Tshianeo vho vha vha tshi omisa khali dzavho ḓuvhani vha kona u dzi fhisa.
4
Mulilo u no fhisesa u fhisa khali dza khwaṱha.
-
U fhisa khali nga mufhiso muhulu hu bvisa maḓi a re kha khali. Vumba ḽa oma ḽa tou te!
-
Khali dza Vho Tshianeo dzo vha dzo khwaṱha lune dza shuma tshifhinga tshilapfu.
5
Khotsi a Tshilidzi na vhone vho ita uri a takalele Saintsi na Vhuinzhiniara.
-
Vho Marwala vho vha vhe mudededzi wa mbalo tshikoloni tsha henefho Duthuni.
-
Tshilidzi o guda mbalo dza muandiso a sa athu thoma tshikolo nge a vhala bugu dza u andisa mbalo dza khotsi awe.
6
Tshilidzi o vha muthu wa u ṱoḓou ḓivha zwithu. Vhusiku o vha a tshi dzhia thotshi ya khotsi awe a vhonetshela ṱaḓulu uri a vhone hu no fhelela ḽiṱaḓulu!
-
Tshilidzi o ri u phasa phuraimari, a ṱuwa a ya a dzula hosiṱeḽe ya Dimani High School ḓoroboni ya Shayandima.
7
Hosiṱeḽe ho vha hu tshi takadza ngauri o ṱangana na vhathu vhaswa. Tshilidzi o guda u tshila na vhaṅwe vhana sa vhana vha mme.
-
Tshilidzi o mbo ḓi fhirela Mbilwi High School. Vhadededzi vha Tshilidzi vha Mbalo na Saintsi vha afha vho mu nyanyula vhukuma. Vha mu ṱuṱuwedza uri a shumese.
8
Kha ṅwaha wawe wa u fhedza, Tshilidzi o kunda kha muṱaṱisano wa National Youth Science Olympiad.
-
O wina lwendo lwa u ya London kha Foramu ya Vhaswa ya Mashango oṱhe ya Saintsi.
-
Tshilidzi o guda Vhuinzhiniara ha Mekhenikhaḽa Yunivesithi ya Pretoria.
-
U bva afho o dzhena Yunivesithi ya Cambridge.
9
Tshilidzi o tama u ḓivha uri thekhinoḽodzhi i nga khwiṋisa hani vhutshilo hashu. O guda zwa Saintsi ya Khomphyutha ngei England.
-
U bva afho, lutamo lwawe lwa u guda lwo mu isa Amerika he a guda zwa Thekhinoḽodzhi na Vhuinzhiniara.
-
Nga murahu ha miṅwaha minzhi ya u guda, Tshilidzi o humbula u vhuyisa nḓivho yawe hayani, Afrika Tshipembe.
10
O thoma u shuma sa mubveledzi wa sofuthiwee ya khomphyutha, a tshi shuma na zwa maṱali a mafanedza.
-
Maṱali a mafanedza ndi musi mitshini i tshi shumisa vhuṱali vhu no anzela u wanala kha vhathu.
-
Tshilidzi o bveledza phurogireme i no ita uri khomphyutha dzi thetshele na u nukhedza zwithu sa vhathu!
11
Ṋamusi Tshilidzi ndi makone wa zwa Vhuinzhiniara ha Mekhenikhaḽa na zwa saintsi ya khomphyutha.
-
Nga tshino tshifhinga, Phurofesa Marwala vha khou shuma na zwa uri khomphyutha dzi kone u ri itela zwithu zwinzhi sa banngani, zwibadela na zwikoloni.
12
Tshilidzi o sedzesa zwa uri Thekhinoḽodzhi i nga sikela hani vhathu mishumo ine ya ḓo khwiṋisa vhutshilo havho.
-
U khou fhaṱa nḓivho ya zwa Saintsi na Thekhinoḽodzhi.
-
Vhutshilo ha Vho Marwala vhu sumbedza ndeme ya pfunzo na u futelela vhutshiloni. Na ndeme ya u ṱoḓou ḓivha!
13

——Mbudziso


  1. Ndi vhonnyi vhe vha ṱuṱuwedza Tshilidzi uri a vhe muḓivhi wa saintsi? Ndi ngani ni tshi ralo?
  2. Tshilidzi o guda zwifhio musi e hosiṱele?
  3. ‘Saintsi ya Khomphyutha’ ndi mini? Wanani zwiṅwe zwinzhi nga thero iyi.
  4. Vhainzhiniara vha Mekhenikhaḽa vha shuma mini? Itani ṱhoḓisiso nga ha mishumo yavho.
14

——Bugu dza tsielano iyi


  • Andile Mji
  • Asnath Mahapa
  • Bongani Mayosi
  • Charlotte Maxeke
  • Mmantsane Moche Diale
  • Mulalo Doyoyo
  • Tebello Nyokong
  • Tshilidzi Marwala
15

——


Tshiṱori itshi tsho sikiwa na u ṅwalwa nga Tshivenḓa, sa tshipiḓa tsha thandela ya matheriaḽa a u vhala ya Zenex Ulwazi Lwethu ya 2020.
16
Attribution CC BY
Your attribution should include the following:
Title: Khomphyutha dza Tshilidzi Marwala dza vhuṱali
Author/s: Ndivhuho Mutsila
Illustrator/s: Thulisile Shongwe
Assurer/s: Eric Khorombi, Doris Manyamalala
Language: Tshivenḓa

© Zenex Foundation - Saide 2024

CC BY includes the following elements:
 BY   – Credit must be given to the creator