Motsaneng wa GaMaupye ka ntlenyana ga toropo ya Polokwane, Morena Masoga Maupye o laelana le mosadi wa gagwe Mohumagadi Masohlo Maupye.Morena Maupye o fepa lapa la gagwe ka go lema dibjalo. O sepela mesong ka mehla le mpša ya gagwe Mokhudu.

“Lehono gona ke tla se tanya selo seo se senyago dimela tša ka,” gwa realo Morena Maupye. O bolela ka go itshepa.E re ke tšwele pele ke kgotlelele go šoma pele e eba mosegare,” a bolela le Mokhudu.

Morena Maupye o šoma ka maatla ka mašemong.O fepa balapa la gagwe ka tšeo a di lemago. Balapa la ga Maupye ga ba reke bupi le merogo.

Ka morago ga diiri tše mmalwa Mohumagadi Maupye o ile a fihla ka mašemong.O tliša dijo tša matena le meetse.“Thobela Mokone,” Mohumagadi Maupye a dumediša.

Morena Maupye o ile a ja, a nwa gomme a khutša.“Lenyaga pula e re ratile. Dimela ke tše di talana ebile di a kgahliša,” a realo.“Re tla šidiša mekotlana ye lesome ya mabele,” gwa araba Mohumagadi Maupye.

“Lebala ka seo se jago mabele a gago! Re ba bantši,” gwa sega Mohumagadi Maupye.“Ke a bona ga o ntsebe gabotse mmagwe. Ke a ikana, ke tlo se tanya!” gwa araba Morena Maupye.

Ka nako yeo, Morena Maupye o bona mmutla o eja dimela tša gagwe. A fofa, a foša mmutla ka mogoma.“Ke tla se tanya!” gwa goelela Morena Maupye.

Mmutla wa phonyokga wa tšhaba. Mokhudu ga a humane mmutla. Mogoma o ile wa robega.Mohumagadi Maupye o ile a hemela godimo.