Phumelele intfombatane lephuma emndenini lophuyile.Bekahlala esigodzini saseCelani.

Ngalelinye lilanga, Phumelele wasindzisa sigodzi sonkhe ekuhlushweni yinyoka lenkhulu.Lenyoka beyihlala esihlahleni lesitsite eceleni kwendlela lephuma kulesigodzi. Bantfu bebandlula lapho uma baya emtfolamphilo, etitolo nome esikolweni.

Lenyoka beyiwa esihlahleni ivimbe indlela uma iva tinyatselo.Bantfu betama kakhulu kubamba lenyoka kepha bangaphumeleli.

Iminyaka yahamba kepha kwabate lobamba lenyoka. Inkhosi yamemetela kutsi lotawubamba lenyoka utawunikwa umklomelo.Ngemadvodza kuphela labekavunyelwe kungenela lomncintsiswano.

Emadvodza, emajaha kanye nebafana, betama kepha abamange baphumelele. Basebenta nangemacembu bacudzelana kute bahlephulelane ngalomklomelo wenkhosi.Inyoka ayimange ibanjwe. Kuphuma nekungena kulesigodzi bekuloku kumatima.

Phumelele waya enkhosini kuyocela imvumo yekungenela umncintsiswano.Bantfu bahleka ngobe angumfati futsi bacabanga kutsi uyadlala.

Inkhosi yacabanga, “Emadvodza alesigodzi ahlulekile kubamba lenyoka. Ngako-ke akonakali lutfo uma naye ngimnika litfuba.”Ekugcineni inkhosi yancuma kutsi inike Phumelele litfuba. Kepha beyingatsembi kutsi Phumelele angaphumelela entfweni lehlule emadvodza.

Phumelele bekanelicebo lelihle. Waluka imantji lenkhulu lenetintsambo tekudvonsa ubophe, kute abambe ngayo inyoka.Watfwala lemantji enhloko wacondza ngasesihlahleni. Bekafisa kutsi inyoka iwele ngekhatsi emantjini.

Ngalokutayelekile, inyoka yeva tinyatselo yase itilungiselela kuwa ivimbe indlela.Phumelele naye bekakulindzele loko!“Lamuhla kulamuhla,” wacabanga uma asondzela ngasesihlahleni.

Inyoka yetama kwenta bucili bayo kepha lamuhla yawela emantjini lelukiwe.Phumelele wadvonsa tintsambo masinyane kute avalele inyoka ngekhatsi emantjini.

Phumelele wamikisa imantji nenyoka esigodlweni senkhosi.Sigodzi sonkhe sajabula ngalesikhatsi angena emasangweni esigodlo senkhosi.Bonkhe bantfu bebamangaliswe sibindzi nekuhlakanipha kwaPhumelele.

Inkhosi yanika Phumelele indzawo lenkhulu nesibaya lesigcwele tinkhomo njengesipho sekumbonga ngesibindzi sakhe. Wase uba ngumholi waleyo ndzawo. Bantfu bebaya kuPhumelele bacele teluleko ngetinkinga tabo.Inyoka yayolahlwa ehlatsini lelisekudzeni kakhulu. Bantfu bakwati kuhamba bangasabi lutfo.