Edorobheni engihlala kilo, kwakunomma onjingileko ibizo lakhe kungu-Alina.U-Alina wabe ahlala endlini ekulu ehle esithabathaba.Wabe anakho koke, kodwana wabe anganalo ithabo.

Ngelinye ilanga u-Alinah wabe akhamba eduze kwesithabathaba sakhe.Wamomotheka lokha nakacabangako, “Ngingathanda ukuhlangana nabantu abatjha. Mhlamunye ngingazitholela abangani abatjha nange ngiya eholideyini. Kwazi bani ngingahlangana nomuntu okhethekileko.”

U-Alina waplana iholideyi yokuya elwandle elihle khulu enarheni.Wabe athabe khulu lokha ilanga lekhambo lakhe nalifikako.Wafika wangena msinya waledlha ehotela ukobana athabele ivakatjho lakhe ehotela esendaweni ehle le.

U-Alina walala elwandle waledlha. Wabe abukela abantu abazikhambelako.Msinyazana wabona indoda eyabe ikhamba nabantwana ababili. Umndeni lo bewungaqaleki sengathi uthabile.Boke bebaqaleka bangakathabi. Abantwana bebazidlalela ngesidu.

U-Alina wazibuza bona, “ingabe kuza njani batlhuwise kangaka endaweni ehle kangaka.”Ekukhambeni kwelanga, bekaduda edamini lehotela lokha abantwana bendoda le nabezako bazokududa.U-Alina bekafuna ukwazi begodu wathoma wacoca nabo.

Amabizo wabantwana laba kwakunguKarembo noKazungu.Batjela u-Alina bona leli bekulikhambo labo lokuthoma lokuya eholideyini soloko unina ahlongakalako.Lokha u-Alina nakahlangana noyise wabantwana laba, wabona ubuhlungu besizi nokulahlekelwa emehlweni wakhe.Ibizo lakhe kwakunguClemens.

UClemens, u-Alinah besele bakhamba boke baledlhile.UKarembo banoKazungu bathabela ukudlala no-Alina elwandle.U-Alina wabafundisa ukuluka iimantji ngamakari womuthi kanye nokwenza izindlu ngesanda.

Amalanga adlula kamnandi elangeni.U-Alina bekangasafuni ukubuyela esithabathabeni somuzi wakhe onesizungu.“Iholideyi yami seyiyaphela. Mhlamunye nange ngingezelela amalanga wami wokuhlala, angeze ngatlhuwa kangaka, “utjho azibuza.

Mhlokho ebusuku, u-Alina wezwa sengathi kunomuntu okokodako emnyango. Nakavula umnyango, wathola uKarembo noKazungu bajame emnyango.Bakhuluma kanyekanye bathi, “Sifuna ube ngumma wethu!”U-Alina akhange azi bona abaphendule athini.

Ngemuva kobana bakhulume, u-Alina wakhamba noKarembo banoKazungu waya nabo ekamerweni labo.Ukubona abantwana bakhe bathabile nabano-Alina kwenza bona uClemens amomotheke. Wasingatha abantwana wathi balale kamnandi.U-Alina wazitjela wathi, “Ngihlangene nabantu abathathu abakhethekileko.”

Ekuseni u-Alina wakhamba wayokuhlala noClemens nabantwana bakhe badla ukudla kwekuseni.UKarembo banoKazungu baqaleka bamethemba khulu u-Alina lokha nakahlala phasi.“Ingabe kukhona into eyenzekako?” Kubuza uClemens, amomotheka nakaqala ubuso babantwana bakhe.

Ngemuva komnyaka owodwa, u-Alina banoClemens bebatjhadile!Qobe mnyaka, umndeni bewukhamba uyokuvakatjhela ilwandle elihle leli ukobana bazokugidinga ukuhlangana kwabo kokuthoma.Badlala emanzini babumba izindlu zesanda, njengalokha benza lokha nabahlangana kokuthoma.