“Kadzeni esigodzini lesincane saseMasoyi, bekunentfombatane lehlakaniphile libito layo bekunguNomusa.Abehlala nagogo wakhe labengumlimi wemabele.Bantfu balesigodzi bebangakwati kufundza nekubhala futsi bebatiphilisa ngekulima.

Nomusa abetsandza kuhlanganyela ecenjini lelitsite. Watfola kutsi lelicembu kutsiwa sikolo.Njalo uma asuka ecenjini, bekaniketwa umsebenti kutsi ayowenta ekhaya.

Bekumatima kuNomusa ngobe bekumele acoshe tinkawu netinyoni emasimini kutsi tingadli emabele.Nomusa bekumele angayi esikolweni uma gogo wakhe angeke aye emasimini. Bantfu labasha labanyenti bebangakwati kuya kulelicembu ngobe nabo bekumele baye emasimini.

Nomusa abengakutsandzi kucosha tinyoni netinkawu emasimini.Wacabanga licebo lelingamsita.Wacabangisisa wadzimate walitfola licebo lelihlakaniphile.

Wasebentisa kuhlakanipha kwakhe wakha sitfusatinyoni.

Nomusa wabeka lesitfusatinyoni emkhatsini wensimu yemabele wase usigcokisa timphahla takhe.Abefuna kukhohlisa gogo wakhe, kute acabange kutsi Nomusa usemasimini uma asesikolweni.

Abetsatsa ngekufihla timphahla tesikolo nesikhwama, kute antjintje uma asemasimini.Sitfusatinyoni besigcoka timphahla takhe uma antjintja agcoka timphahla tesikolo.

Abengati kutsi lelisu lakhe litokhohlisa gogo futsi licoshe tinkawu netinyoni.Ngekubona lesitfusatinyoni, tinkawu netinyoni atimange tingene ensimini yemabele.

Ngalelinye lilanga emini, gogo waNomusa waya ensimini afuna ummbila loluhlata.Bekuthulile ensimini. Betingekho tinkawu netinyoni. Gogo wacabanga, “Nomusa wenta umsebenti lomuhle.”

Gogo wamemeta Nomusa, kepha kwangavakali kusabela kwakhe.Wachubeka amemeta wadzimate wabona kutsi Nomusa akekho ensimini.Wase ubona lesitfusatinyoni emkhatsini wensimu, sigcoke liloko laNomusa leliphuti nesigcoko lesibovu!

Uma gogo abona lokwentiwe nguNomusa, watigcabha ngaye kakhulu.Wacabanga, “Loku kutawunciphisa umsebenti wekuya emasimini onkhe emalanga kuyewucosha tinkawu netinyoni.”

Sigodzi sonkhe sasebentisa lelicebo. Sikhulu salesigodzi sabita umhlangano sabonga Nomusa.Esikolweni, thishela wanika Nomusa umklomelo ngalelicebo lakhe.Titfusanyoni tagadza emasimini.Bonkhe bantfu labasha baya esikolweni ngemphumelelo.