Nkoko Mapula o ne lebeletse dikhabetšhe fa thoko ga lebati la gagwe. O dirile ka natla go tlhokomela tshingwana ya gagwe. Jaanong ke nako ya go ya go rekisa kotulo ya gagwe kwa marekelong. “Ke tlile go tlhoka thuso go bala le go paka dikhabetšhe,” ga nagana Nkoko.  

Jabu, Dineo le Dimpho ba ne ba feta fa pele ga ntlo ya ga Nkoko fa a ntse a eme fa lebating. O ne a itumelela go ba bona.“Ke kopa lo nthuse go paka kotulo ya me mo mabokosong,” a kopa bana.O ne a itse gore ba botlhale e bile ba rata go thusa.

Bana ba ne ba nagana ka mokgwa o ba ka pakang dikhabetšhe tseo.“A re bale le go paka dikhabetšhe ka ditlhopha tsa bo-pedi,” ga bua Dineo.“A re bale le go paka dikhabetšhe ka ditlhopha tsa bo-nne,” ga bua Jabu.“A re bale le go paka dikhabetšhe ka ditlhopha tsa bo-tharo,” ga bua Dimpho.

Bana ba dumalana gore go bala dikhabetšhe ka ditlhopha tsa bo-nne ke mokgwa wa ka bonako wa go paka mabokoso.“Go tsena dikabetšhe tse somepedi sentle mo lebokosong le le lengwe,” ga bua Dineo.“Lo dirile bontle tota, lo ka bonako!” Nkoko a nyenya. “Jaanong Rre Jonase o tla isa dikhabetšhe kwa marekelong.” 

“Khabetšhe e le nngwe e tla ja bokae?” ga botsa Dineo. “Ke a itse gore lo kgona go balela. Lebokoso le le lengwe ke R60,” ga rialo Nkoko. “Fa lebokoso le le lengwe e le R60 mme le na le dikhabetšhe tse somepedi, re tshwanetse go arola someamarataro ka somepedi,” ga rialo Dineo.

“Ke a itse!” ga rialo Jabu. “Khabetšhe e le nosi e tla ja R5.”“O nepile!” ga araba Dimpho.Bathusi ba ga Nkoko ba ne ba paka dikhabetšhe.Rre Jonase o ne a itumeletse gore tiro yotlhe e ne e dirilwe. “Ke ya go netefatsa gore dikhabetšhe tsotlhe di a rekisiwa kwa marekelong,” a rialo. 

Bana ba ne ba dutse fa tlase ga setlhare ba ikhuditse. Nkoko o ne a phuthetse sengwe ka fa tlase ga khiba ya gagwe.  “Ke eng seo?” ga botsa Dineo.  “Ke tuelo ya lona go lo lebogela tiro e ntle e lo e dirileng. Fela lo gopole go e aroganya ka go lekana,” ga rialo Nkoko. 

Bathusi ba ga Nkoko ba ne ba goeletsa ka boitumelo. Nkoko o ba file diapole tse dintsi tse di botshe.  “Di lebega di le monate”. Ga bua Dineo a ntse a itatswa melomo.  “A ke diapole tsa rona tsotlhe tse?” Dimpho a botsa a maketse. “Ee, fela lo gopole gore lo tshwanetse go di aroganya ka go lekana!” ga bua Nkoko.  

“A re bale diapole,” ga tshitsinya Dimpho. Ba ne ba bala diapole ka ditlhopha tsa bo-pedi. “Go na le ditlhopha di le robedi tsa diapole tse pedi, le apole e nosi ya tlaleletso. Palogotlhe ya diapole ke somesupa,” ga bua Dimpho. “Go raya gore re tshwanetse go aroganya diapole di le somesupa re le bararo,” ga bua Jabu.  

Ngwana mongwe le mongwe o ne a bona diapole tse tlhano tse ba di badileng, mme ga sala diapole tse pedi. Ba tlhakane ditlhogo. Ba ipotsa gore ba tlile go aroganya jang diapole tse pedi. “A re sege diapole tse pedi ka dihalofo,” ga bua Dimpho. “A re sege diapole tse pedi ka dikotara,” ga bua Jabu.  

“Boraro ba rona ga bo kitla bo kgona go aroganya dihalofo kgotsa dikotara ka go lekana,” ga ngongorega Dineo.“A re feng Nkoko le Rre Jonase diapole tse di setseng,” a tshitsinya.   “Ee, gonne “Nkoko o lemile le go tlhokomela dikhabetšhe,” ga dumalana Jabu. “Gape Rre Jonase o isitse kotulo kwa marekelong,” ga tlaleletsa Dimpho.  

Rre Jonase o ne a boa kwa marekelong a rekisitse dikhabetšhe tsotlhe.Dimpho a aroganya diapole tse di setseng magareng ga Nkoko le Rre Jonase.  Bathusi ba ga Nkoko ba ba botlhale ba ne ba le motlotlo ka tiro ya bona. Ba dirisitse kitso ya dithuto tsa kwa sekolong go thusa Nkoko go aroganya ka go lekana.