Vhamusanda vha mufumakadzi Vho Lufuno vho vha vha tshi vhusa muḓana wa Roswika.Vhamusanda vha mufumakadzi Vho Lufuno vho vha vha tshi vhusa nga u luga na nga vhuthu.Vho vha vhe na vhuṱali vhuhulwane.

Vho vha vha tshi fara muṅwe na muṅwe nga nḓila i fanaho.Zwenezwo zwa ita uri vhathu vha vha funese.Vho Maluṱa vho vha vhe muṅwe wa vhaeletshedzi vha Vhamusanda vha mufumakadzi Vho Lufuno.

Munna wa Vho Maluṱa, Vho Tshidino, vho vha vha tshi silingwa nga vhuthu ha havha Vhamusanda vha mufumakadzi. Vho vha vha sa funi nḓila ine vhathu vha vha renda ngayo.Vha tshi ri, “Hu uri Vho Lufuno vha na mini tshine nṋe nda si vhe natsho? Ndi nga vhusa khwine u vha fhira.”

Ḽiṅwe ḓuvha, Vhamusanda vha mufumakadzi na Vho Maluṱa vho vha vha tshi khou amba nga nḓila ya khwine ya u ḓisela vhathu maḓi.Fhedzi vha si tendelane.

Zwenezwo zwo sinyusa Vho Maluṱa. Musi vha tshi swika hayani vha ya kha munna wavho.“Nṋe na Vhamusanda vha mufumakadzi a ro ngo tendelana nga nḓisedzo ya maḓi,” vha tshi amba vho sinyuwa.

Vho Tshidino vha humbula vha ri, “Ndi nga ita zwithu khwine arali ndo vha ndi khosi.Vha ṱuṱuwedzwa nga nḓila i si yavhuḓi ine mufumakadzi wavho vha ḓipfa ngayo nga Vhamusanda vha mufumakadzi.

Nga ḓuvha ḽi tevhelaho, Vho Tshidino vha kuvhanganya vhathu vha muḓanani.Vha vha vhudza uri, “Ri nga si vhuswe nga musadzi. Ndi ḓo vha khosi ya khwinesa.”

Vhathu vho kuvhanganaho vha humbulisisa nga maipfi a Vho Tshidino.Vha si tendelane navho.

Muṅwe a amba ari, “Vhamusanda vha mufumakadzi vha a ri humbulela. Vho fhaṱela vhana vhashu zwikolo.”Muṅwe a ri, “Ri na masimu nahone vha ita vhungoho ha uri muṅwe na muṅwe u na maḓi. Ndi murangaphanḓa wavhuḓi.”

Muthu wa vhuraru a engedza, “Ro no vhuswa nga vhathu vho fhambanaho. A thi athu vhona Vhamusanda vha mufumakadzi vha vhuṱali u fana na Vho Lufuno. Dziṅwe khosi dzi ḓa fhano dzi tshi ḓo humbela nyeletshedzo khavho.”

Vha ri u pfa ayo, Vho Tshidino vha humela hayani vho sinyuwa zwihulu.Vho Maluṱa vha ri khavho, “Vhathu vha Roswika vho amba. Vha fanela u ṱanganedza zwine vhathu vha zwi ṱoḓa.

Musi mafhungo a tshi swika nḓevheni dza Vhamusanda vha mufumakadzi, vha setshelela.A vho ngo ṱarafa Vho Tshidino ngauri vho zwi ḓivha uri vho kunda.Musi ḽo lala, hu na u bvelela na dakalo, vhathu vha ḓo tikedza vharangaphanḓa vhavho.