Lilanga Lalabasha
Sponono Mahlangu
Simangaliso Sibiya
Siswati
First paragraphs

——


ENingizimu Afrika, mhla ti-16 Inhlaba liholide lelibitwa ngekutsi Lusuku lweLusha.
-
Lendzaba imayelana nemlandvo waleliholide, kanye naloko lekwenteka ngalelo lusuku ngemnyaka wanga 1976.
1
“Niyakwati yini lokwenteka ngeLilanga Lalabasha ngemnyaka wanga 1976?” Gogo ubuta batukulu bakhe, Buhle naVusi.
-
“Kwenteka umlandvo ngemhlaka 16 Inhlaba ngemnyaka wanga 1976 eSoweto!” kusho gogo.
2
“Bekusekuseni ngemhlaka 16 Inhlaba ngemnyaka wanga 1976. Bekumnyaka wami wekugcina esikolweni.
-
Lelilanga lagucula umlandvo,” kuchubeka gogo.
3
“Besibafundzi betikolo letahlukahlukene taseSoweto. Besihlele kumasha sisuka etikolweni tetfu silibangise enkhundleni yetemidlalo i-Orlando.
-
Besihlele imashi lenekuthula.”
4
“Benibhikishelani?” kubuta Buhle.
-
Gogo uyachaza, “Umbuso welubandlululo bewusicindzetela kutsi sifundze ngelulwimi lweSibhunu, besingahambisani nalowo mtsetfo. Satfukutsela kakhulu!”
5
“Sayisukumela indzaba yekukhululeka kwebafundzi belibala lelimnyama eNingizimu Afrika.
-
Phela besifuna imfundvo lencono kuwonkhewonkhe. Kanye nemfundvo lelinganako kuwonkhewonkhe eNingizimu Afrika.”
6
“Kwase kwentekani?” kubuta Vusi.
-
“Sasimasha silibangise emhlanganweni enkhundleni yetemidlalo i-Orlando. Tinkhulungwane tebafundzi tahlanganyela kulemashi. Besijabule kakhulu!” kuphendvula gogo.
7
“Sisamasha njalo, emaphoyisa asihlasela!
-
Asiphosa ngethiyagesi. Tinja temaphoyisa tasihlasela!
-
Setama kubeketela sachubeka nekuhamba.”
8
“Bacala kudubula ngetinhlavu.
-
Kunesitfombe lesidvumile lesatfusa umhlaba wonkhe.
-
Sitfombe saHector Pieterson acukulwe ngumngani wakhe,” kusho gogo ngekudzabuka.
9
“Kwagcina njani gogo?” kubuta Buhle naVusi ngemavi laphasi.
-
“Lombhikisho waseSoweto wabhebhetseka kulolonkhe live. Bafundzi labanyenti nebasebenti bahlanganyela kulombhikisho.
-
Bantfu kuwo wonkhe umhlaba basekela lombhikisho,” kuphendvula gogo.
10
“Lolutfutfuva lwaseSoweto lwalubalulekile ekulweni nelubandlululo. Sabita lelolanga ngekutsi ‘Lilanga laseSoweto’. Laba liholide lemphakatsi lavelonkhe ngemnyaka wanga 1995,” gogo utjela Buhle naVusi.
-
Ngabo 1990, kwaba nemibhikisho lemikhulu yetibhelu telusha,” kukhumbula gogo.
11
“NgeLilanga Lalabasha laVelonkhe, bantfu baseNingizimu Afrika bahlonipha bantfu labasha lababulawa kulombhikisho wemnyaka wanga 1976.”
-
“Sikhumbula bantfu labasha labasita kucedza lubandlululo,” kusho gogo ngekutigcabha.
12
“Yonkhe iminyaka ngeLilanga Lalabasha kuba khona imicimbi, imihlangano nemakhonsethi eveni lonkhe.
-
Kufanele singawukhohlwa umlandvo welive letfu,” kusho gogo aphetsa indzaba.
-
Uyamamatseka ugona Buhle naVusi.
13

——Imibuto


  1. Ngubani lococa lendzaba? Ngubani lolalela lendzaba?
  2. Bantfu labasha baseSoweto bebamasha bayaphi ngemhlaka16 Inhlaba ngemnyaka wanga 1976?
  3. Bebamashelani?
  4. Laba nini liholide lelilanga lamhlaka16 Inhlaba ngemnyaka wanga 1976?
14

——Tincwadzi letikuloluchungechunge


  • Lilanga Lekubuyisana
  • Lilanga Lenkhululeko
  • Lilanga Lemagugu
  • Lilanga Lemalungelo Eluntfu
  • Lilanga Labomake
  • Lilanga Letisebenti
  • Lilanga Lalabasha
15

——


Lendzaba isungulwe yabhalwa ngesiSwati njengencenye yemsebenti wetintfo tekufundza weZenex Ulwazi Lwethu ngemnyaka wanga 2020.
16
Attribution CC BY
Your attribution should include the following:
Title: Lilanga Lalabasha
Author/s: Sponono Mahlangu
Illustrator/s: Simangaliso Sibiya
Assurer/s: Malibe Thembekile Felicia, Mduduzi Benjie Shongwe
Language: Siswati

© Zenex Foundation - Saide 2024

CC BY includes the following elements:
 BY   – Credit must be given to the creator