Gatwe e tsile maloba fale, ga bo go na le monna mongwe a bidiwa Mosimane.O ne a le maitseo e bile a le lerato. O ne a rata go ya kwa nokeng go ya go iketla.Ka letsatsi lengwe fa a le kwa molapong a kopana le Noga.

“Dumela Noga,” ga bua Mosimane.“Dumela rra,” ga araba Noga.Noga o ne a raya Mosimane gore o kgona go mo humisa. Mosimane o tshwanetse fela go rwala Noga mo tlhogong mme a mo ise ko a ratang gona.Noga o ne a lebega a tshepagala.

Mosimane o ne a le bonolo. O ne a dumalana go rwala Noga mo tlhogong mme ba kgabaganya noka.Ba tshetse noka mmogo.

Kwa moseja, Noga o ne a kopa mosimane gore e nne ditsala ka gonne bone ka bobedi ga ba na ditsala.Mosimane a dumalana ka gangwe.Mo tseleng ba kopana le Rre Phiri.

Rre Phiri a re, “Dumelang bagaetsho.”“Dumela Rre Phiri,” ba arabela gongwe.“Lo lebile kae?” ga botsa Rre Phiri.“Re ya ko ke batlang teng,” ga araba Noga. Rre Phiri o ne a gakgametse thata.

“A o amogela moputso o montle wa go rwala noga motlhogong?” Rre Phiri a botsa Mosimane.Mosimane a se bue sepe ka ga se Noga a se mo solofeditseng.Mosimane le Noga ba tsamaya go ya pele.

Morago ga sebaka ba tsamaya mo nageng, Mosimane a lapa.Bobedi jo ba feta malome Phokoje gaufi le setlhare sa moriti.Malome Phokoje a lebelela noga e itshopere mo tlhogong ya monna. O ne a sa dumele se a se bonang. A swa ka setshego.

Noga a bua ka lentswe le le galefileng a re, “Monna phokoje o a bo o tshega eng? Kana setshego se a lotlhaganya!”“Nna le Noga re ditsala tsa nnete!” Mosimane a raya Malome Phokoje.Malome Phokoje a busetsa mogopolo kwa morago. A simolola go bua a iketlile.

“Noga fologa ke tle ke utlwe Malome Phokoje sentle,” ga bua Mosimane.A tswelela go bua, “Noga, ke go thusitse go tshela noka. Ke go thusitse go fitlha fa. Moputso wa me o kae? Ke ne ke nagana gore re ditsala.”

Malome Phokoje a botsa, “A ga o itse gore dinoga ga di tshepege?”Noga o ne a bona gore Mosimane o galefile thata mme Noga a tsena sekgwa.Mosimane kwa gae a fitlha a bolelela batho ka ga noga.Go fitlha le gompieno, dinoga ga di tshepiwe ke ope.