Köju ꞌberon lele ŋuto kata ko nakwan nanyit. Lepeŋat kata ko ŋwajik lyan buker ko ŋuro nakwan geleŋ.

Karin ti ŋuro nakwan na luŋu a Kapuki. Kayuŋwök ti Kapuki nyanyar lepeŋ parik lwölwöŋ na luŋasirik kanyit.

Kayuŋwök ti Kapuki a tin ŋuro nase tuli loꞌdit a ꞌdoket nase.

Kapuki nyanyar tuli lonyit parik. Lepeŋ nyanyar birye ko tuli.

Lor lele, ŋwajik lyan a böŋödu, a uŋgö gwalaggu tuli lo Kapuki. A gwalaka teŋ ko gwe a kaꞌbelya naꞌdiꞌdik.

Luŋasirik tine den ko se kondya nyo. A lepeŋat gumbi kaꞌbelya kune muꞌdiŋ.

Kapuki gwe i gaꞌyu na tuli lonyit ama ako ryö asut. Lepeŋ gwe a yuran parik a gwine gwien. Lepeŋ a renya nyesu na kinyo asut.

Lepeŋ a mamandu parik adi ti kayuŋwök ko luŋasirik kanyit galaki nye tuli lonyit.

Kapuki gwe a yuran parik, a lepeŋ nu wöki wökön a itit muꞌdiŋ.

Lepeŋ a kija i ködini lojo ki pajo.

Kayuŋwök ti Kapuki gwe i gaꞌyu na ŋuro nase, Kapuki.

Se a ryö lepeŋ na, a piji lepeŋ ti kiyeni kak. Ama lepeŋ a renya. Se a takin lepeŋ ti kiyeni kak ama lepeŋ a tiddya renya.

Luŋasirik ti Kapuki a momorja a yoloni köli, pija lepeŋ ti kiyeni kak.

Nyelo köli lo. "ꞌDutet nikaŋ na yuŋwe, kiyeni kak a yi tu mede. Yi de ryö ryö tuli ludukötyo."

Kapuki gwe i toꞌbetan ko luŋasirik.

A yoloni nye köli lo geleŋ lo, miryakindu luŋasirik, "Ninini-ninini-ninini. Ninini-ninino."

Ju na Kapuki a po mörji pupurja na lepeŋ, ti kiyeni kak.

A lepeŋ yoloni adi, "Ju nio, anyen yi ko tu mede. Yi de ryö ryö tuli ludukötyo!"

Madaŋ madaŋ, a Kapuki suluji kiyundya kak i ködini.

Ju nanyit meŋga yolo teŋ ko Kapuki a ꞌdur kak.

A Kapuki rome ko ju nanyit.

A lepeŋat gwe wöröji madaŋ teŋ ko kase Kapuki mede.

Kayuŋwök ko luŋasirik ti kapuki a lyöŋön parik i meddya nase nagon kine ŋwajik murek aje po mede. Mede liŋ a kondya rorwe duma, julin ko lomede liŋ.

Kapuki a lyöŋön ko tuli lonyit ludukötyo.