Igîama nyia ôbô neto ônnô odiha iko hônyê îmana jio ôbô namiji hinyia owon ꞌtô igum dôŋê Maûnt Kênya, imisihi ômôlîha hutto iduoŋi hôllôŋ.

Omuno nyia Wangari êwatîta illet.

Orômô nyia inyi ta ahêbû ifuher hosi.

Ettê îyêhîna enyiomo hullo odihara ꞌtô iromit diyya.

Omuno nyia inyi alla ara ôlôtôrîaî. Ottutta nyia Wangari îhaŋ elle iriok attarî buo fê alla abeŋ inyi inyiak igunyutta enyiomo hunne isuruni ꞌtô.

Alla alô miji, adaha nyia inyi tê êkôrî matta buo fê allaŋ ôwôrîô.

Ilôfîôrô nyia Wangari, buo fê îhîhîra ꞌdaŋ jio hotti alô inyi sukul. Atî, awahî nyia bô hônyê iko mônyê jio igiara inyi oluahio isi êgêmîta hutto haŋ.

Hinyia asôhînî aŋasi Wangari hattarîk, êttê illa allittokon îbana jihosi jio ijiara Wangari ôllô sukul.

Omuno nyia Wangari ettiyana. Ittiyenu nyia inyi êrrê arriaî tô buhi hunyia îhîana inyi. Igêm nyia inyi ônnô oyyu tô sukul, êttê itiloŋo inyi jio ijiara ôlô îhîana Amîrîka.

Ihîhîra nyia Wangari maŋ-maŋ-maŋ ta amuno! Awak nyia inyi îmîjana êrrê arriaî hutto faû.

Iyunifasiti Amîrîka diyya, ittiyenu nyia Wangari êrrê aŋejuho arriaî. Ittiyana nyia inyi êrrê ꞌyani iko esuruna hosi ôbôlôrôrîk.

Iyiu nyia buo fê inyi eloduri honyi: abala iko illarak honyi îbalî ꞌyanio hutto muri Kênya.

Ninyia ittiyenu inyi êrrê arriaî, buo amolie watî Kênya êttê iŋiyo inyi bêbê. Awak nyia inyi jio ijiara aatî Kênya amanyaî ta amuno tajia.

Ennê ittiyenu fê inyi êrrê arriaî, buo êttê fê iyiuna êrrê arriaî hutto miji hosi.

Hinyia atuhok inyi êhîana honyi, êttê icohuno Kênya.

Asô nyia nafaû ꞌdaŋ amatta. Abeŋi nyia buo fê aŋoruo ôrûmattaî êyêk hunne îmayêrîk.

Ihûrîaî nyia aatî bêbê buo fê oniamaî.

Ittiyen nyia Wangari aŋoruo idulie aŋêr ꞌyani aŋaî, iko ecia hosi.

Itinyiaŋie nyia aŋoruo hûnîa ayyani hûa hômûtarî, buo êttê îdûhûna anyahuo hunno opocuni isi hûa îtaŋiyerek hutto haŋ hosi. Asamî nyia aŋoruo hûnîa buo fê ayyani êttê isur arriaî imiji.

Hinyia allaŋî aŋasi, abolori nyia ayyani hunne îdûlanî isi hûa attimottihien, êttê atua ôwôrîô hunyia ajûranî ꞌtô inyiak iŋettio.

Ettê asayyo Wangari hûnîa îsarrarra afaû Afîrîka ꞌdaŋ. Jio ôlôŋ ala ahana, isuruni ênyôŋî ꞌyani jio aŋêr ꞌyani hunyia îdûlak Wangari.

Tê êgîama honyi ônô ediofo iko jio miji, êttê êlûlûŋ-êtamanyanî-tô-faû-ꞌdaŋ isiarana Wangari esiori-lohuo anna anya "Abijon-taji ônô êmûara."

Ihîŋa 2004, Wangari Maathai nyia ara êttêrî ŋôttê êmôlî tô Afîrîka ônô ôrûmak ꞌtô esiori anîa, buo fê ara êttêrî ŋôttê ênnê îhên ꞌtô ecia-hidiofo.

Ayê nyia Wangari îhîŋa 2011. Atî êllê egonyu fê hôhôî ayyani, buo hôhôî êttê igigilo inyi oŋitek ꞌdaŋ.

Eremik iduloro êhanio êrrê hunyia êgêm Wangari tê edulio ꞌyani iko ecia hidiofo hôhôî.