Yi wae tean ki yi bae kwen Mambilla yi sku Nigeria wog ti isir tso, mbae ti ndae ki ndeya iyawu yi fong. Inyi nawu si Wanderimam.
Wanderimam shang ra ti song yi ise. Awu tom ko fong ti baepwe naba ti uda nawu. Awu tso sin tinyang yi bin.
Awu shang skep ureb iye ti isir sunpo. Iye ti uwog a zwi ki ti awu shae uwog cwo be, awu nung po na iye ndepo ti awu kafe ru wasog. Awu putsa fango ti iying yi wae fong, awu kyang iyen miki ikab.
Wanderimam bean yip ma shang ti wu kafe ru manta. Iyawu ti itsewu ma shang skep ti awu na song ndeyaba yi wasog. Iye ti awu ser kae ising tsong-faen, inyawu ti ko risha bi itsewu ti na yawuta ti awu na ru manta.
Awu shang kang ti kwen! Wanderimam ya wae tsi yi kang ti kwen. Kyana ti kwab na wu, a kwen wu ru yi manta ti yang na Ahmadu Bello ra ta tean Zaria. Wanderimam mbub tob! Awu shang ti wu kwen rae yi su taen sae.
Yi manta ti yang na Ahmadu Bello ti Zaria, Wanderimam kwen kang kaen tak. Awu kwen rae yi su wuchi ra ser ibin. Awu tongsong fango ti awu ser: nde ru ti me inyawu yi nzwi tuku yi wae rikong Kurmi.
Shong ti awu sitae kayana Taraba ko timambe kyana kang ti wu kwen. Awu shang ti abana mbub wae tu riya. Kang ti kwen nawu ndawu tongson ti tean nawu ti bae kwen.
Iye ti awu gbayaen kang ti kwen, wu kafe ru tean nawu, Taraba. Miki kang ma kafe. Miki fong ti yang nae kwab tean. Miki nde tu ba tuku ti a zwu rwa be. Nde ta wae kaen, nyisu zwub min.
Wanderimam nung kang ti awu nde. Awu kwen tatswa ndeba fango ti a yen tuku. Ndeba jabci tuku yi pu ser yi nung rae wasog naba. Wanderimam ndeyaba ti anung gbakang ti asitae.
Iye yatswa, tuku tishe yi ser kafe wae kong, ikab kafe pong msa cwo. Rae ti kwen na Wanderimam kyang kwab wae Nigeria. Yinga, tuku kuko mi ser tso kyana sin na Wanderimam.
Wanderimam nde wande kaen tak. Nde, patak Nigeria shae, ndawu kuko, kyana tuku ti awu kong. A kwen na Nigerian Conservation Prize, awu ma si nda Kuteb ti paenzwo ra mbe kuko wu.
Wanderimam bean rom yi 2018. A ti tonsong te wu iye ti ti a shae tuku tinyang.