Isikhukhukazi noSongololo bebabangani. Kodwana ngaso soke isikhathi bebaphalisana.

Ngelinye ilanga bathatha isiqunto sokudlala ibholo erarhwako ukubona bona ngubani umdlali ophuma phambili.

Baya ekundleni yezemidlalo bathoma ngomdlalo wabo. Isikhukhukazi besirhaba, kodwana uSongololo bekarhaba khulu.

Isikhukhukazi sararhela kude, kodwana uSongololo wararhela kude khulu. Isikhukhukazi sathoma ukusilingeka.

Bathatha isiqunto sokurarha amaphenalthi. Kwathoma uSongololo waba ngumendi.

Isikhukhukazi sagondela igondelo elilodwa. Ngemva kwalapho kwaba lithuba lesikhukhukazi lokuba ngumendi.

USongololo wararha ibholo wakora. USongololo wajikisa ibholo wakora.

USongololo waqhula ibholo wakora. USongololo wakora amagondelo amahlanu.

Isikhukhukazi besikwatile ngombana besihluliwe. Bekusihluleki esimbi khulu.

USongololo wathoma ukuhleka ngombana umngani wakhe bekatshwenyeke khulu.

Isikhukhukazi besisilingeke khulu sakhamisa khulu begodu saginya usongololo.

Lokha isikhukhukazi nasele sibuyela ekhaya, sahlangana nomma uSongololo.

Umma uSongololo wabuza wathi, "Azange ubone umntwana wami na?" Isikhukhukazi sathula. Umma uSongololo bekatshwenyekile.

Ngemva kwalapho umma uSongololo wezwa ilizwi elincani. "Ngilekelela mma!" kulila ilizwi.

Umma uSongololo wathalaza bewalalelisisa ngokuyelela. Ilizwi belivela ngaphakathi kwesikhukhukazi.

Umma usongololo warhuwelela, "Sebenzisa amandla wakho akhethekileko mntwana wami!"

Abosongololo bayakwazi ukwenza iphunga elimbi bebanambitheke kumbi. Isikhukhkazi sathoma ukugula.

Isikhukhukazi sabhodla. Ngemva sathimula besakhohlela. Sakhohlela godu.

USongololo bekafuna ukusihlanzisa!

Isikhukhukazi sakhohlela bekwaphuma uSongololo obekangemathunjini waso.

Umma uSongololo banomntwana wakhe bakhasela phezulu komuthi bayokubhaqa.

Kusukela ngaleso isikhathi, isikhukhukazi noSongololo baba manaba.