Mëëdan tëëkɛ ji̱ dhɔaar ti cieŋ wi̱c mi na̱n kɛ rɛk. Kä wec ɛmɔ tëëkɛ rup mi tekɛ ley.

Tëëkɛ dho̱l mi cɔal i̱ Dɛŋ kɛnɛ nyiman mi cɔal i̱ Nyakuiy. Cieŋkɛ kɛɛl kɛ mandiɛn.

Ca kɛ ŋi̱eec kɛ ɣöö bi kɛn a gaat ti gɔw ti cieŋ kɛ tɛ̈th lɔaac.

Dɛŋ la ŋarɛ rɛy ɣɔ̱ɔ̱ kiɛn kä ŋäcɛ nyiön deet.

Kä cuɛ ka̱k leyni ŋa̱c bä, kä la wëë mac yieer kɛ kuɛt.

Kɛ cäŋ kɛl cuɛ bath. Kä cu man diɛɛr kɛ gua̱a̱th in cɛ wä thi̱nɔ. Cua go̱ r gua̱thni ti ŋuan kä /ka̱ n jɛ jek.

Cuɛ jɔɔc kɛ thiaŋ, jälɛ kɛ wi̱c thiel. Cu man ɛ thiec i̱, "Ci wä nikä kä ɛŋu rɔmi mɔ?"

Cuɛ jɛ loc i̱, "Ci nɛy wä kak kɔnɛ dhɔɔl."

Kä man diɛɛrɛ kɛ ɣöö ka̱k leyni dɔaar bɛcɛ. Cuɛ jiök i̱, "/Cu rɔ nyɔk kɛ wä kak rɛy ruɔ̱ɔ̱p."

Kä /kenɛ ruac man liŋ. La rɔɔdɛ a kualɛ ruup ɛ nyɔk. Cu man rɔ moc kɛ kɛɛt i̱ duäcɛ jɛ kɛ ɣöö /cɛ lui̱k liŋ. Mëë cɛ kɛɛt nɛn tetdä man, cuɛ rɔ bar. Cuɛ rɔ wä tɔ̱w wi̱c jiaath. Cu man ɛ go̱r kä /kenɛ gua̱a̱thdɛ jek.

Cu Nyakuiy jɛ cɔl kä cuɛ jɛ jiök i̱, "Deŋ, Mama thiɛlɛ jɛ, ku ben piny ban ben mi̱th kɛ kuän." Cuɛ ben piny.

Cu man jɛ nɛn kä cuɛ jɛ jiök i̱, "Thukni kɛ mi̱eth bi kɔn tekɛ ruac."

Mëë ci kɛ thuɔ̱k kɛ mi̱eth, cu riŋ ni jɛn guäth ŋarä kä cuɛ jɛ wä rɛ̈t käk ɛ nyɔk.

Cuɛ man wi̱cdɛ gäy kɛ ciaaŋdɛ. Kä cuɛ jɛ go̱r i̱ bɛ jɛ naŋ rɛɛk duelgɔ̱rä. Cuɛ ca̱r kɛ duɔ̱ɔ̱p in dee gatdɛ ruac ɛmɔ liŋ kɛ jɛ kɛ kui̱c kä ɣöö derɛ nhɔk.

Cuɛ wargak gɔ̱a̱r däman ni Bidiit mi cieŋ rɛɛk. Kɛ kɔr gua̱th cu Bidiit wargak ɛ mɔ loc. Larɛ jɛ i̱ bɛ ben ja̱l wi̱c.

Cu Dɛŋ kɛnɛ Nyakuiy lo̱ckiɛn tɛɛth kɛ ɣöö bikɛ ben jëk kɛ nääriɛn min bëë rɛɛk.

Kä kɛ kɔr path cu nääriɛn cop.

Cu mandiɛn kɛ jiök i̱, "Gaatkä, ci näärun ben."

Cu Nyakuiy wee i̱, "Can wä jëk kɛ nääran, Dɛŋ." Kä cua to̱k dɔl ɛ kɛn kä cukɛ riŋ kut nääriɛn ni Bidiit.

Cu nääriɛn ni Bidiit kɛ jiök i̱, "Kɛ yɛn gaat ti gɔw." Cu mandiɛn ɛ lar i̱, "Diɛwä jɛ bɛ la tɛ̈th lɔaac i̱ bia wä cieŋ rɛɛk kɛ näärun kɛɛl."

Cu Bidiit kɛ jiök i̱, "Bä yɛ naŋ rɛɛk kä bia wä gɔ̱a̱r.

"Kɛ kɔr päthni da̱ŋ ŋuaan bi babuur ben kä bä yɛ kööt rɛydɛ.

"Mi wia wä cop rɛɛk, bä yɛ kök jio̱o̱kthiɛliɛkni bä."

Cu gaat lo̱ckiɛn tɛɛth ɛ bi tɛ̈th lɔaac kɛ dee pën mi̱eth kɛ cäŋ ɛmɔ.

Kɛ kɔr juɔkni da̱ŋ rɛw cu Bidiit ni̱n lɔŋädɛ thuuk. Kä cuɛ loc rɛɛk.

Kɛ kɔr päthni da̱ŋ ŋuaan cu babuur ben loorɛ Nyakuiy kɛnɛ Dɛŋ. Cu mandiɛn kɛ la̱th rɛy babuurä kä cukɛ rɔ nër mal.

Cu babuur gaat ja̱a̱l kɛ nin bärɔw kɛ rɛy yiëër.

A wä babuur kɛ wä, Dɛŋ kɛnɛ Nyakuiy guɛckɛ juaac riŋkɛ.

Cu kɛn tekɛ tɛ̈th lɔaac kɛ ɣöö wäkɛ duelgɔ̱rä.

Cu kɛnɛ go̱o̱ri̱ bikɛ gɔ̱r ni ŋuɔt kiɛ ki̱i̱m duëlwal.

Mëë ci babuur cop rɛɛk, cukɛ nääriɛn jek lipädiɛn thok waath babuuri.

Cu Dɛŋ dɛy jiɛɛn ka̱m raar kä kämɛ kɛ gaat näärɛ. Cukɛ thiec kɛ duɔɔth i̱, "Kɛ ŋuuni?"

Cu Dɛŋ kɛ loc i̱, "Kɛ dɛy jiɛɛn rɛy cieŋ. Comkɛ."

Cu Nyakuiy kɛnɛ Dɛŋ cieŋ rɛɛk kɛ nääriɛn kɛɛl kɛ run.

Cukɛ lät ɛ bum duelgɔ̱rädiɛn amäni mëë cikɛ thuɔ̱k kɛ gɔ̱a̱r.

Mëë cikɛ rɔ jek lät, cu kɛn mandiɛn luäk.