Mëëdan tëëkɛ wut mi cɔal i̱ Macoc. Cɛ wä rɛy ruɔ̱ɔ̱p, ɛ jɛn i̱ wëë jɔp kɛ jiɛn ti lätdɛ luaakdɛ.

Mëë wëëkɛ, cuɛ pöör ram mi ci li̱w ni wal wä jek.

Kä cu Macoc pöör indaan kuɛt kɛ cio̱o̱kdɛ kä cuɛ wee i̱, "Ji̱n pöör ɛmɛ, ci ji̱ ku näk niɛ lɛpdu ɛ lual ɔ."

Kä cu pöör indaan jɛ jiök i̱, "Amäni ji̱n bä, bi ji̱ lɛ näk niɛ lɛpdu ɛ lual ɔ bä."

Kä cu Macoc ga̱a̱c, kä cuɛ dual ɛlɔ̱ŋ, kä cuɛ jɛ ŋɔac wi̱c kɛ pɛ̈th mi di̱i̱t ɛlɔ̱ŋ ɛlɔ̱ŋ.

Kä cuɛ cop cieŋ a lathɛ jɛ. Kä cuɛ thiec i̱, "Macoc ɛŋu ci tuɔɔk kä ji̱ mɔ?"

Cuɛ wee i̱, "Tëëkɛ mi di̱i̱t mi ci tuɔɔk min cä wä rɛy ruɔ̱ɔ̱p. Ɣän cä wa̱ jɔp kɛ jiɛn ti la̱tdä ni luaakdä, cua pöör ram mi ci li̱w wä jek piny, kä mëë cä jɛ kuɛt kɛ cio̱o̱kdä, kä jiökä jɛ i̱, 'Ji̱n pöör ɛmɛ, ci ji̱ näk niɛ lɛpdu ɛ lual ɛmɔ?' "

Kä cuɛ ɣä jiök i̱, "Amäni ji̱n bä, bi ji̱ näk niɛ lɛpdu ɛ lual ɛmɔ bä. Kä cua rɔ cu bar kä ri̱eeŋä ni cieŋ, kɛ ɣöö bä min ci tuɔɔk ben la̱r naath."

Mëë ca ruac ɛmɔ liŋ ɛ naath, cukɛ gääc ɛlɔ̱ŋ ɛlɔ̱ŋ. Kɛ ɣöö thilɛ pöör mi ci li̱w, mi dee ruac.

Cu naath wee i̱, "Wut ɛmɛ cɔal i̱ Macoc ɔ, jɛn tekɛ kac mi diit ɛlɔ̱ŋ."

Kä cu Macoc naath jiök i̱, "Ɛ puc, ɛ puc. Nɔmɔ cɛ tuɔɔk."

Cuɛ wee i̱, "Mi ɛ yɛn i̱ kacä jɛ, ɣän bä yɛ naŋ guäth in tëë thi̱n."

Kä cua jiök i̱, "Ji̱n wër lätni ruac ɛmɔ kuäär wec."

Kä cu kuäär wec indaan Macoc jiök i̱, "Ji̱n bi naath naŋ guäthdɛ ɛn pöör ɛ ruac ɔ."

Kä cuɛ Macoc jiök i̱, "Kä mi wä ruacdu nɔmɔ wä la kac ɛŋu mi ba lät kä ji̱?"

Cu Macoc wee i̱, "Yɛn bia ɣän näk!"

Cu nɛy diaal mat kä ɣöö ba Macoc näk mi /ken pöör ruac.

Mëë ci naath cop rɛy ruɔ̱ɔ̱p kɛ Macoc kɛɛl, cuɛ pöör indaan wä jek ɛ thuɔ̱k.

Cu Macoc ɛ kuɛt kɛ cio̱kdɛ kä jio̱kɛ jɛ i̱, "Ji̱n pöör ɛmɛ, cu ji̱ ku näk niɛ lɛpdu ɛ lual ɛmɔ?" Cu pöör indaan biɛt ɛ lik.

Cu Macoc jɛ nyɔk kɛ kuɛt kä cuɛ wee i̱, "Ji̱n pöör ɛmɛ, ci ji̱ näk niɛ lɛpdu?" Kä cu pöör indaan biɛt ɛ lik.

Cu Macoc pöör kuɛt nikä diɔ̱ɔ̱k, ŋotdɛ thilɛ mi ci pöör ɛ loc.

Kɛ kɔrɛ cu naath wee, "Wut ɛmɛ ɛ gua̱n kacä, cɛ kɔn kaŋ amäni kuäär wec. Banɛ jɛ näk kɛ ɣöö thilɛ ram mi dɔ̱ŋ mi bi kac mi di̱i̱t mi ce̱tkɛ mɛmɛ nyɔk kɛ ka̱c."

Cua Macoc cu näk.

Mëë ca Macoc näk, cu pöör indan ɛ jiök i̱, "Ɣän /ka̱ nɛ la̱t ji̱ i̱ amäni ji̱n bä bi ji̱ näk niɛ lɛpdu ɛ lual ɛmɔ."

Kä min ci naath ruac ɛmɔ liŋ, cukɛ ga̱a̱c ɛlɔ̱ŋ kɛ ɣöö ca Macoc näk baaŋ.