Mëëdan tëëkɛ wut mi gɔaa mi ŋäc ŋɔak ɛlɔ̱ŋ. Cɔal ciötdɛ i̱ Mayian. Tëëkɛ thäk mi ke̱r. Thäk cio̱tdädɛ ɛ Mayiankertuut. Mayiankertuut tëëkɛ gɔl mi di̱i̱t kä tëëkɛ ɣɔ̱k ti ŋuan bä.

Tëëkɛ lëët ti ci jiɛɛn ro̱o̱liɛn, kä cukɛ ben Ro̱o̱lnath kɛ gör kä mi camkɛ. Wutlɛ̈t kɛl jälɛ kɛ ciekdɛ mi paydap, kä ci buɔth kɛ näk kɛ ɣöö thilɛ mi̱eth mi camkɛ.

Ci Mayiankertuut ɣɔ̱ɔ̱kɛ luɔny laak. Mëë ci lëët ɣɔ̱k nɛn, cukɛ kɛ joc, kä cukɛ thäk Mayiankertuut mi ke̱r käp. Cua liŋ ni go̱lo̱ŋ lo̱thädɛ ni wi̱c, mëë ca yuɔr piny, kä cuɔ cam.

Cu ŋuɛ̈tni ri̱i̱ŋ kɛ wuɔ̱ɔ̱r mi di̱i̱t. Riŋkɛ guäth in ca thäk cam thi̱n. Cukɛ wutlɛ̈t kɛnɛ ciekdɛ min paydap nɛn ɛ tekɛ mi̱th tha̱a̱k. Cukɛ lëët yiath kä görkɛ näkdiɛn. Cu Mayiankertuut cop kɛ pɛ̈th, jälɛ kɛ ko̱t kɛnɛ wëthdɛ mi di̱i̱t.

Cuɛ rɔɔdɛ ka̱m mua̱a̱l, kä cuɛ mutdɛ guath kä mua̱a̱yɛ. Cuɛ cieklɛ̈t mi ci dap kɛ cuɛ̈ɛ̈k dhɔɔli da̱ŋ rɛw nɛn. Cu Mayiankertuut ŋuɛ̈tni ka̱p cuɔ̱ŋ, kä cuɛ wutlɛ̈t kɛnɛ mangɔaalɛ pën näk. Cuɛ ŋuɛ̈tni jiök, "Pa̱lɛ kɛ! Ɛ kɛ camkɛ thääkdä, ɛ buɔth dapä. Wutni, bär ni ciaŋ."

Cu ŋuɛ̈tni lui̱k Mayiankertuut liŋ. Cu Mayiankertuut kɛ jiök, "Wuɔcɛ löthdɛ kɛnɛ dhuɔɔrkɛ. Naŋɛ kɛ wi̱c. Pa̱lɛ ri̱i̱ŋdɛ, ɛ camkɛ ɛ kɛn." Cu lëët lo̱ckiɛn tɛɛth ɛlɔ̱ŋ kɛ min ca la̱t ɛ Mayiankertuut.

Kɛ kɔr runi, cu Mayiankertuut kɛnɛ wutni da̱ŋ dhieec wä ja̱l. Wäkɛ gör kɛ miy ro̱o̱l mi na̱n. Mëë cikɛ cop ro̱o̱l ɛmɔ, cu nhiaal mi di̱i̱t dɛ̈m, kä cukɛ wä caak luaak.

Ɛn luak ɛmɔ ɛ luak lɛ̈t. Cukɛ niɛɛn thi̱n. Cu lɛt min mɔ gua̱n luaak jiɛɛn kɛ wäär, wëë lëët tin kɔ̱ŋ wä la̱rlär. Cuɛ kɛ jiök, "Tëëkɛ wutni da̱ŋ bäkɛl ti ci Kuoth kɛ nöŋ kɔn, bia, banɛ kɛ ben puur ni kaakdä."

Cu lëët lunh kɛ runwaŋ. Cukɛ thääk dha̱a̱ri tha̱t ti di̱t, ti ci thia̱ŋ kɛ pi̱ lɔap maac, ti dëë ben ciithni naath. Kɛ kɔrɛ dëëkɛ cu cam. Kä rɛy lëëtni tëë ci ben, lɛt kɛl rɛydiɛn ɛ jɛn lɛt ëë caam thäk Mayiankertuut. Jɛn ca kɔŋ kän kɛnɛ gaatkɛ ɛ Mayiankertuut.

Cuɛ cunh rɛy luaak lɛ̈t min puɔ̱rkɛ kaakdɛ. Ɛ ŋot keekɛ ni puur, cuɛ Mayiankertuut ŋic. Cuɛ wee, "Ɣa̱la̱! Ɛ ji̱n Mayiankertuut?" Cu Mayiankertuut ɛ loc, "Ne̱rɔ dheeŋ!"

"Ɣɔ̱ɔ̱n! Ɛn ram min cɔalkɛ ni kɔ ɛn ɣöö ba ben puur ni kak, ɛ ji̱n Mayiankertuut?" cuɛ thiec ɛ dɔlɛ to̱k.

"Juää!" cu Mayiankertuut ɛ loc. "Mayiankertuut bër raar! Kɛ yɛn da̱ŋdi?" cuɛ jɛ thiec. "Kɛ kɔn da̱ŋ bäkɛl," cu Mayiankertuut ɛ loc. Cu lɛt ɛmɔ lëët thiec, "Tëëkɛ ram mi kui̱c cuɛ̈ɛ̈kä tin kɔn?" Cu wutlɛ̈t in puɔ̱rkɛ kaakdɛ ɛ loc, "Ɣëc, thilɛ ram mi kui̱ckɛ."

Cu wutlɛ̈t lëët la̱t cäät, kä latdɛ jɛ, "Wut ɛmɛ mëëdan cakɔ thääkdɛ mi nhɔkɛ ɛlɔ̱ŋ cam kɔnɛ ciekdä. Mëë ci ŋuɛ̈tni wecdiɛn ri̱i̱ŋ kɛ ɣöö bakɔ ben näk, cuɛ kɔ gaŋ. Duŋ mi thil ni jɛn, ɣän kɔnɛ ciekdä kɛ cuɛ̈ɛ̈kä tin kɔn /cakɔ dee tëk."

Cu lɛt Mayiankertuut kɛnɛ dämani ka̱m raar rɛy luaak. Cuɛ kɛ naŋ ni cieeŋdɛ. Mëë cikɛ cop cieeŋdɛ, cukɛ kɛ moc kɛ kuan kɛ took kɛ tuɔ̱ŋ ti /ka̱n me̱t cam.

Cukɛ niɛɛn kɛ muɔŋ kɛɛl kɛ lëët. Cu wutlɛ̈t kɛ thiec, "Kä kɛ ŋuuni kɛn tin bia ben go̱r Ro̱o̱lëëtni?" Cukɛ wee, "Kɔn bakɔ ben go̱r ni miy. Kɛn miy kɛ nyin wutdä. La̱thkɛ kɛ ŋuääk kɛnɛ tet."

Mëë ruɔ̱ndɛ, cu wutlɛ̈t kɛnɛ gaatkɛ wä kak kɛ guëc. Cukɛ miy ti ŋuan nöŋ Mayiankertuut kɛnɛ mäthnikɛ. Mëë ci gua̱a̱th ben, cu Mayiankertuut wutlɛ̈t jiök, "Kɔn bakɔ loc Ro̱o̱lnath." Ɛn wutlɛ̈t kɛnɛ gaatkɛ cukɛ Mayiankertuut nam kɛnɛ mäthnikɛ, ɛ cukɛ cop ni Ro̱o̱lnath kɛ mal.

Mëë cikɛ cop, cukɛ ciaŋ mi gɔaa mëë ca wä cieeŋnikɛ ɛ lëët wä la̱r naath. Kɛn lëët tëë ci Mayiankertuut kɛ gaŋ mëë ca thääkdɛ cam, kɛ kɛn tin tëë ca Mayiankertuut kɛnɛ mäthnikɛ kän. Ɛ jɛn, ci riet Mayiankertuut mëë laarɛ ben ɛla thuɔ̱k. Ɛn ɣöö, "Bär ni ciaŋ." Cɛ duɔth ɛla ka̱a̱ŋ mi larkɛ ɛ naath ɛn ɣöö ci Mayian wee, "Bär ni ciaŋ."