Luth ɛ rec in col ce̱tnikɛ yiec cukä. Colɛ ɛ cui̱c kä ɛ nyäthnyäth. Ta̱a̱dɛ ce̱tdɛ kɛ thɔ̱l min cɔal i̱ nyääl. Ku duŋdɛ ɣöö camkɛ jɛ. Kui̱ cɔ̱wkɛ kɛ ɣöö di̱t ni ri̱i̱ŋdɛ.

Tëëkɛ räl ti tɔt ti cɔalkɛ gɛl. Mi ci raan kɛ cam, la thiecɛ ni gɛ̈l mi dɔ̱diɛn kɛ ɣöö comkɛ ɛ yum. Ɛn luth ciɛŋɛ yieer duŋdɛ ɣöö mi ci ɣɔw rueel, la delɛ piny.

Rɛy ri̱cäda, thilɛ ram mi leny gua̱a̱r kɛ mi̱eth luuthni kuɛ la ɣöö pa̱a̱rkɔ ɛ juc.

Kɛ cäŋ kɛl, cu gua̱a̱r ɣɔ̱k yial laak. /Ka̱ duɔth luɛŋ kɛ ɣöö nhɔakä ta̱a̱ gekä gua̱a̱r ɛlɔ̱ŋ.

Mëë cakɔ cop paan, cu gua̱a̱r jɔkdɛ cat kɛ ɣöö luaaŋɛ puɔ̱nydɛ kɛ ŋuëk kakä. Cuɔ ɣɔ̱kɔ ku la liacä lɛɛr kamä min te gua̱a̱r pur waŋdɛ.

Tëëkɛ pul mi thieek kɛ gua̱a̱th la̱k ɣɔ̱ɔ̱k. Kamdiɛn kɛnɛ thuc mi te raar cɛ do̱o̱n. Ci luth ɛmɔ dël thi̱n. Cuɔ jɔw liŋ ɛ bat wee, "Ɣub!"

Cuɔ dhɔŋ ni ɣöö ɛ ruathda mi yiek ni jɛn, duŋdɛ ɣöö ɛ jɔw luɔ̱ɔ̱th. "Ɣub!" ɛ nyɔk. Cuɔ wee, "Nyaŋgari! Ɛ jɔw luɔ̱ɔ̱th mi del piny!"

Cuɔ jɛ nyɔk kɛ käm tiit. Gua̱a̱r tëë juupä waŋdɛ thaar thëëp. Cuɔ gua̱a̱r nɛn ri̱i̱ŋ. Cuɛ ɣä thiec i̱, "Kä tɛ lotdä in mith ɛ jɔw luɔ̱ɔ̱th?" Cuɔ wee, "Mɔn!"

Cu gua̱a̱r jɛ caar a /cɛ jɛ jek. Cuɛ kuɔm kä cuɛ wee i̱, "/Ciɛ kui̱c ɛn luth la ɣubɛ kä locɛ biɛt?" Cuɔkɔ li̱ep kä /kerɛ met ɣuup ɛ tɛk.

Kɛ nyaŋthiaŋ, cuɔkɔ ɣɔ̱kɔ yiëël ciëŋrɛy.

Cuɔ ɣɔ̱kɔ yian, yaŋɔ kɛ depdɛ, tuutdɔ kɛ depdɛ, jiɛthɔ kɛ ŋuäkɔ, cukɔ kɛ lo̱cdɛ.

Gua̱a̱r tëë to̱ŋ gɔali.

Mëë ci ɣɔw baak, cuɔkɔ ɣɔ̱k naŋ laak. Cu gua̱a̱r jɔkdɛ cat thaar thëëpdɛ. Cuɔ ɣɔ̱k la liacä lɛɛr.

Kɛ jɛn cäŋ ɛmɔ, cuɔ tuɔk ba̱a̱r kɛɛl kɛ rɔɔdä. "Bä dhil kɛ näk ɛn luth indaan. /Cɛ jɛ bi met put ɛn wa̱lɛ," ŋɛ̈rä kɛ lɔcdä.

Ja̱ lä ɛ cärcär. Cuɔ tuɔk indaan yɔ̱t.

"Ɣub! Ɣub!" cuɛ wak. Cuɔ mua̱c, "Lapdho̱r-mi-cɔ̱tbɛ̱̈ɛ̱̈! Cɛ jɔɔc!"

Cuɔ jɛ liac thar thuɔ̱ɔ̱c mi te cueecdä kä cɔalä gua̱a̱r. Cuɔ jɛ yiɛth. Cuɛ bithdä töl taŋ. Cu gua̱a̱r ri̱i̱ŋ kɛ bithdɛ. Cuɛ jɛ yiɛth kä cu luth li̱w.

Cuɔkɔ jɛ guëëth raar ɛ dhɔ̱w. Cu lɔc gua̱a̱r tɛɛth kɛ ɣöö cɛ duɔɔth in la go̱o̱rɛ jek. Cuɔkɔ wä cäŋ. Cuɛ cua jɛn cäŋ tɛthä lɔaac cieŋda.

Cu gua̱a̱r cuɔ̱ɔ̱l luɔ̱ɔ̱th guëëth raar kä cuɛ jɛ ka̱m dɔw jio̱kda. Cuɔkɔ käpdɛ cam kɔnɛ dämaar min ca bul rɛy tɔŋä.

Cu gua̱a̱r ɣä ku nhɔk ɛ yum.