Ayei kolong ekile. Eusit ng'esi aberu na ebus noi. Nabo abarit ng'esi ng'ibaren.

Abu aberu keng topotiu ikoku dio kidou. Abu lokile keng talakar noi kotere eboyito kechi nikooyen nyeanyuna ikoku.

Kotere etich lokaalan, aloseene aberu akilep ng'ibaren kiperik ikoku tooma lokol. Kinenek akurum ang'akile lopem.

Nacha idong'io ikoku lokol bon, anyouni ng'esi tong'oba ng'akile dio kikalou, topeu itokeng kikanakanak.

Ng'arwa nakaalak, ariamunio ng'akile aikoku keng'obar. Pe ayenio ibore ang'obanari ng'akile aikoku.

Abu aberu ng'ina kisisak ekile keng ng'akiro ng'una. Apeikwaar abu ekile toperu, toduk kirumunia ekamatan ang'akile aikoku.

Sodi ekile kirum atamar ikwa erai ikoku keng Muurui! Ng'esi enyouni tong'oba ng'akile dio kikalou.

Kisisak ekile naberu keng ng'akiro na abu ng'esi kirum. Tonupa daang atamar aria ikoku kech Muurui. Totiakut aramakin tosiwakis ikoku Muurui.

Nakwaare niti ejotoe ikoku Muurui, apotu aberu ka ekile taramakis kimiekis ng'esi anawiyong'orot. Kimiekinere ng'esi aite, akine ka akaal namojong.

Tokienyu Muurui nataparachu torukau erai ng'esi bo edong'it nwaiyong'orot. Abu ng'esi taar akine ka akaal anierumor kimiek aite toloma nakook.

Dio aite tolot adaka ng'inya anachokor. Abu ng'esi kiriamun ka ekaloton la anyamit akoro noi.

Kichum ekaloton ng'olo aite ebala atanyam akiring. Napei kona kiira ng'esi Muurui anaboi aite ebala,   "Kiyapunae ayei naminyika!"

Napei kona! Abu Muurui tanamakin namedo aekile kang'olo. Kipung'ar ekile ng'alo toesik tani akiring aite kaneni nyenyama.

Tolot ekile ng'olo tani ni alomit awi keng. Kipeyo ng'esi Muurui a emesek aloatuman noi.

Kimuj Muurui kimwon, talakar dio torotok nakware!