Ndráa drɨ̀ò ezóanzɨ na mú éjá òwùrɨá.

O'dú 'dàsɨ̀ ètú drɨ tʉ̀ ànɨ́ sí yíá mú yí wě. Avɨ́, òyǎ yí yɨ mà ruá àzɨ́nɨ sǎ yí.

Cotí emú esú ně kɨ́nɨ̀ ètú 'de 'bo. Arí yɨ mvɨzʉ́ àkúá.

Yɨ nɨ́ 'ye rɨá carɨá àkúá, Candiru jɨ drí 'ɨ́mà ombeléá sɨ̀. èrɨ vɨ́lé nyónyó om'beléá rɨ̀ mà e'yó àvɨ̀ dè èrɨnɨ́ 'dálé! "kɨ́rɨ́kɨ̀rɨ̀ àdà kɨ́ ngà mánɨ́ drì vɨ́lé 'dálé 'dóo!" 'Bà màtʉ́ ɨ́mà agyípɨ́ yɨ vʉ́. Te èrɨ mà agyípɨ 'yó kɨ́nɨ̀ sâ dɨ́ vɨ́lé.

Candiru nga drì dǎ vɨ́lé yíá 'dálé a'dúle. Esú 'ɨ́ vɨ́lé nyórò ombeléá rɨ̀ rá dɨ́ká arɨ́ 'ɨ emvɨ́zʉ́ àkúá. Te àngʉ̀ bɨ̀zà drí àvɨ̀ gèrìá rá.

Nè dìzà rè 'dánɨ engázʉ́ jó àzɨ́nɨ mà alɨ́á. Mu vʉ́nɨá 'dálé rá kpò jótilé.

Òsù nèzʉ́ kɨ́nɨ̀ òcé zì jótilé nɨ̀ dɨ́ká òcó ndê 'yo, "'ɨ́ lè à'dʉ àfa nɨ?" "má àvɨ̀ àvɨ̀ àzɨ́nɨ álèté mánɨ́ pàrí lazʉ́," Candiru 'yo. "Mɨ́ efɨ́ jóá, ákà muzʉ́ mɨ̀ cɨzʉ́ kʉ." Òcó ndérɨ̀ nga 'yo. Candiru nga dɨ́ fɨ́ jóá.

Òcó nga cotí 'yó, "mɨ́ a'dɨ́ mánɨ́ nyaká." "Te má a'dɨ́ nɨ́ ngà òku nyaká òcó nɨ́ kʉ 'dɨ̀." omvɨ èrɨ. "Mɨ́ a'dɨ́ ákàzʉ́ mɨ cɨzʉ́ kʉ!" òcó 'yo. Candiru nga dɨ́ nyaká a'dɨ́ òcó ndê drí rá.

Cotí òcó kɨ̀nɨ̀ "mɨ́ edé má vɨ́lé gbóló drì." Candiru kɨ̀nɨ̀ "má edé ngà òku drɨ̀ò gbóló drì òcó drɨ́ kʉ" 'mɨ́ edé, 'ɨ́kà edé kʉ ma mɨ́ cɨ." Candiru nga dɨ́ gbóló edé rá."

Ó'dú àlʉ àlʉ vʉ́sɨ̀ rɨ nyaká a'dɨ́, àngʉ̀ wé àzɨ́nɨ àfajó òjɨ̌ òcé 'dà drɨ́. Ó'dú àlʉ òcó nga 'yó Candiru ma àndrʉ̀ mú má agyípí àzɨ́ yɨ vʉ́ òmûrʉ́. 'ɨ́we jó alé, mɨ́ a'dɨ́ nyaká diká mɨ́ òjɨ̀ àfa yɨ dèngà má ecánɨ́ kʉ.

Òcó kà mú drì kó mú 'bo, Candiru enze drì'bɨ́ éfɨ́ engázʉ́ 'ɨ́mà drɨ̀á na. 'Bà drì'bɨ́ éfɨ́ àlʉ rɨ̀ gbóló ètɨ́á, '`ba àlʉ rɨ̀ jótilé ètɨ́á 'bà dɨ́ àlʉ rɨ̀ tí lícóá. Apá dɨ́ óngú èrɨ mà pá nɨ́ ecózʉ́ èrɨ jɨzʉ́ rá rɨ̀sɨ̀.

Òcó kà mú emvɨ́ 'bo, e'dó Candiru nɨ ndǎ. "Candiru mɨ́ ngòá yà?" "ma gbóló ètɨ́á 'dò 'ɨ́" drì'bí òkòrɨ̀ 'yo. "ma jótilé ètɨ́á 'dò 'ɨ́ " drì'bɨ́ ìrìzú rɨ̀ 'yo. "ma tí lícóá 'dò 'ɨ́." drì'bɨ́ nazʉ́rɨ̀ 'yo.

Òcó nɨ̀ dɨ́ cotí kɨ́nɨ̀ Candiru olé 'ɨ 'bo. Nga dɨ́ nzʉ́ kpere ényáti 'dà mà alɨ́á 'dálé. Te Candiru mà adrípɨ́ rɨ́ èrɨmà drì tě àbé be. Ngà dɨ́ apá vɨ́lé 'dálé. Kpere àndrʉ̀ 'bá nè nɨ́ ngà èrɨ dɨ́ká kʉ.