Kare kare abaiseke batato bakagenda gotenya chinko.

Nigo riarenge rituko omogaso obarete mono igo bagaetera roche goaka ontimbu. Bagachiesa na gosiarerana amache amo na goaka ontimbu amache ime.

Ake igo bakainyora buna konyora bwachakire koira. Bakaayerera bwango koirana gochia nka.

Ekero barenge ang'e goika nka, Nozibele agakuna ebigoti biaye. Akanyora bwebire rindere riaye roche! "Gaki toirane nainwe, ing'iranesie!" akabaebereria abasani baria baye. Rakini abasani baria baye bagateba konyora bwairire goetania.

Igo Nozibele akairana bweka gochia ase oroche roria. Akanyora rindere riria riaye nakoayerera koirana gochia nka. Rakini agasira omosunte ime.

Egeka are iga akarora oborabu bokorwa ase enyomba gete. Akaayerera gochia aroro nogokong'onta omorangu.

Ase omoichano oye, esese ekaigora omorangu oria nakomoboria, "Ninki otagete?" "Gaki nasirire enchera naende nigo intagete ase yokorara," Nozibele agateba. Inchwo soa, gose inkorome," esese eria egateba. Igo Nozibele agasoa enyomba ime."

Esese eria egateba, "Indugere!" "Rakini tinanya korugera esese naende," akairaneria. "Ruga, gose inkorome!" esese eria egateba. Igo nozibele akarugera esese eria endagera.

Naende esese eria egateba, "Ing'arere egetanda eke!" Nozibele akanyetebia, "Rakini tinanya kwarera esese naende." "Ara egetanda, gose inkorome!" esese eria egateba. Igo Nozibele akara egetanda keria.

Kera rituko goika arenge korugera na kwabusera amo na gosiberia esese eria chiyanga. Rituko erimo esese eria egateba, "Rero nintagete gochia gotarera abasani bane. Abusa enyomba, ondugere endagera nagosibia ebinto biane intarairana."

Buna riria esese eria yachiete, Nozibele akabutora chitukia isato korwa omotwe oye. Akabeka etukia eyemo nse yegetanda, eyemo magega y'omorangu, n'eyemo ase orobago. Koruoo agatama gochia nka sobo nekerundo ekenene.

Ekero esese eria yairanete, akarigia Nozibele. "Nozibele, ng'ai ore?" ekarangeria. "Noo nde igaa nse yegetanda." Etukia eria entang'ani egateba "Noo nde igaa magega yomorangu," etukia eria yakabere egateba. "Noo nde igaa ase orobago," etukia eria yagatato egateba.

Abwo esese eria ekamanya buna nozibele nigo among'ainete. Igo ekaminyoka nakogenda baka ekenyoro kiabo Nozibele. Rakini abamura bamwabo Nozibele nigo banyeganyete nebiranya. Esese eria egatama ekairana nakorua abwo tiyanya kororekana naende.