Tene tene vyũ, eĩtu atatũ nĩmaendie kuna ngũ.

Nũndũ sua nĩyaĩte mũno nĩmaendie ũsĩnĩ kũthambĩa. Nĩmathaũkie na kũtivũa kĩw'ũ na kũthambĩa.

Kwa mĩtũkĩ nĩmamanyie kana nĩmaseleetwe kwĩnũka. Nĩmekalatile masyoka ndũanĩ.

Mevakuvĩ na mũsyĩ Nozimbele nĩwakwatie ngingo yake na amanya kana nĩũlilwe nĩ ĩsoa yake! Nĩwesũvie anyanyae make akĩmea, "aũme ndũngei." ĩndĩ anyanyae make nĩmaleile makyasya nĩkũtukie.

Kwou Nonzimbele nĩwasyokie ũsĩnĩ eweka. Nĩwosie ĩsoa yake na asemba enũke. Ĩndĩ nĩwoie nũndũ wa kĩvindu.

Nĩwonie kyeni kĩkumĩla kanyũmbanĩ kũndũ kũasa. Nĩwekalatile na akũna oti mwangonĩ wa kanyũmba kau.

Kwa ũsenyo ngitĩ nĩyavingũie mwango na yamũkũlya, "wenda kyaũ?" Nĩwasũngĩie asya, "nĩnũie na nendaa vandũ va kũkoma. "Lika nzĩnĩ kana ngũũme," ngitĩ nĩyaisye ũu. Nonzimbele nĩwalikile kanyũmbanĩ."

Ngitĩ nĩyamũie, "mbuĩe." "Ndyauĩa ngitĩ ĩngĩ," Nonzimbele nĩwasũngĩie. "Ua kana ngũũme," Ngitĩ nĩyamũtavisye. Kwou Nonzimbele nĩwauĩe ngitĩ lĩu.

Na ĩndĩ ngitĩ nĩyaisye, "mbalanĩlye kĩtanda." "Ndyalanĩlya ngitĩ kĩtanda ĩngĩ," Nonzimbele nĩwasũngĩie. "Alany'a kana ngũũme," ngitĩ nĩyamũtavisye. Kwou Nonzimbele nĩwalanilye kĩtanda.

Kĩla mũthenya auwaa na kũtuta na kũthambĩsya ngitĩ. Mũthenya ũmwe ngitĩ nĩyaisye, "Nonzimbele ũmũnthĩ nonendaa kũkethya anyanyae makwa. Tutaa, ua lĩu na wĩthambya syĩndũ syakwa ndanasyokethya."

Ngitĩ aumala oou Nonzimbele nĩwosie nzwĩĩ itatũ kuma mũtweni wake. Nĩwaiie ũswĩĩ ũmwe uungu wa kĩtanda, ũngĩ mwĩlingĩlĩlo wa mwango na ũngĩ kyũũnĩ. Na ĩndĩ nĩwasembie ũndũ ũla ũtonya enũka.

Ĩla ngitĩ yasyokie nĩyamanzie Nonzimbele. "Nonzimbele wĩva?" nĩyakũmũkie. "Nĩvaa uungu wa kĩtanda," ũswĩĩ wa mbee nĩwaisye. "Nĩvaa mwĩlingĩlo wa mwango," ũswĩĩ wa kelĩ nĩwaisye. "Nĩvaa kyũũnĩ," ũswĩĩ wa katatũ nĩwaisye.

Ngitĩ nĩyamanyie kana Nonzimbele nũmĩkengie. Nĩyasembie na yasemba ndũanĩ ya andũ. Ĩndĩ nĩyakitisye aamwanainya ma Nonzimbele mamyetele na mĩtĩ. Ngitĩ nĩyalyũkile yasemba na kuma mũthenya ũsu ndĩaoneka ĩngĩ.