Mundalo tsiabura khale, abakhana bataru batsia okhurenya tsikhwi.

Omubasu kwali nikwakha omululu pa, kho nibatsia okhwilama mumwalo. Belama nibabaya nibaanyulana kho amatsi mumwalo.

Betsulila mbu efise fiwere. Nibaalalasia okhutsia ingo.

Olwa bali busa ambi nende ingo, Prisca nara omukhono kwe mwikosi lie. Yali niyebirire eshiuma shie! "Bayie chame khukalusheyo!" Naomberesia abashie. Nabo abashie nibaboola mbu efise fiwere muno.

Kho Prisca nakalukha khumwalo yenyene. Yanyoola eshiuma shie khandi nayuchilisia okhutsia nango. Abula, yakora injira khulwe eshilima.

Ale kho, yalola obulafu okhurula mukhatili. Yayuchilisia okhutsiayo ne nakhong'onda khu muliango.

Okhumuwuchisia, okubwa nokwekula omuliango nikumureba, "Wenya shi?" "Engorire ne ndikomba mbu enyoole kho abundu engone." "Injira, nomba ekhulume!" Okubwa oko nikumuboolera. Kho Prisca niyenjira.

Bwangu bwangu okubwa oko nikumuboolela, "Yalikhao ufuchile!" "Esie eshili okhufuchilakho imbwa ta," Prisca nakukalusia. "Fuka bwangu nomba ekhunyanye," Okubwa oko nikumubuurulira. Kho Prisca nakufuchila obusuma.

Khandi okubwa oko nikumuboolela kuri, "Nzalila eshitali!" Prisca nakuboolela ari, "Esie eshiri okhwalira kho imbwa ta." "Nzalila bwangu nomba ekhunyanye!" Okubwa oko nikumubuurulira. Kho Prisca nakwalira eshitali.

Buli nyanga yakufuchiranga nende okhweya obweru, nende okhukufuyila okubwa oko. Inyanga yindi okubwa oko nikumuboolela kuri, "Prisca, nyanga ino enzia okhuchendera abetsa banje. Yeya inzu, oteshe efiakhulia khandi ofuye efindu fianje, nendakalukha tawe."

Olwa okubwa oko kwali nikwakhatsia, Prisca yakhunyula obushinga butaru okhurula khumurwe kwe. Yara olushinga lulala mulwalo weshitali, olundi inyuma wo muliango, nolundi mulukaka. Mana niyelukha tsimbilo bwangu bwangu natsia ewabu.

Olwa okubwa oko kwakalukha, kwakhaaba Prisca. "Prisca, oli yena?" Nikubuurula, ng'eee. "Endi ano, mulwalo weshitali," olushinga lwa mbeli nilukalusia. "Endi ano inyuma womuliango," olushinga lwakhabili nilukalusia. "Nga endi ano, mulukaka," olushinga lwa khataru niluboola.

Bulano okubwa oko nikumanya mbu Prisca yali nakubayire omubayo. Kho nikwirukha khandi nikwirukha tsimbiro, okhuula mwitala liabu Prisca. Nabo abasiani babu Prisca bali nibakulindileyo busa nemilabushi emikhongo. Okubwa oko olwa kwabalola, nikushukhana tsimbiro. Ne okhurula olwenolo, kushiri okhulolokhakho mwitala omo khandi.