Omogondo o'baba nigo orenge kororekana buya – nigo obwate amaemba, obori, n'emiogo. Korende ekiya ase bionsi pi biria barengeoo namataoke Nonya baba obwate abana abange, nigo namanyete buna ninche anchete ase abachokoro baye bonsi. Nigo anarete kondangeria gochia mwaye. Naende ontebia obobisi bwaye bokeboke. Nonya nigo obobisi obomo mbore atatagete gontebia: nabwo mboria bwa'se arenge gotoberia amatoke aye.

Rituko erimo inkarora egekabu ki'amakendo kebekire ase omogaso isiko mwa'baba. Ekero namoboretie buna negiaki, richibu nanyorete ndiria buna: "Ekio negekabu kiane kiogokorera ebikone" Ensemo y'egekabu keria amagoma y'eritoke narengeoo anarete gonchoreria kera rituko. Inkarengereeria inkamanya komoboria, "Amagoma aya nayaki?" Richibu naende nanyorete ndiria buna, "Aya na amagoma ane y'ogokorera ebikone."

Inkagoka rende korigereria magokoro, amagoma aria amo n'egekabu keria ki'amakendo. Korende baba agantoma ing'ende komokorera egasi gete. "Gaki, baba tiga indore buna okorosia." "Tiga konyogerera omwana oyo, kora buna ogotebigwa," agantebia kare buna oyobeete. Inkaminyoka ebirundo ebinene gochia gokora egiatagete.

Ekero nairanete, inkanyora baba gainkaransete isiko riaye korende gekabu keria amd n'amagoma aria tibiarengeoo. "Baba ing'ai kwaira egekabu keria, ing'ai amagoma aria are, naende ing'ai." Richibu nanyorete ndiria buna, "Noo bionsi bire ase ane yogokerera ebikone." Inkaigwa bobe sana.

Amatuko abere agaeta, na baba agantoma inchie komwoyeria akanyimbo kaye agatereire korwa enyomba yaye y'okorara. Yaani buna nasoete nyomba iga, inkaigwa rimisu ri'amatoke amatubo. Ase erumu eria yaime, noo egekabu keria ki'ababa kiogokerera ebikone biaye kiarengegetubire buya n'oborangeti obonene obogotu. Inkaimokereria oborangeti boria igoro ake igo nagotiokerera rimisu riria rigiya.

Eriogi ria'baba rigantaborora ekero andangeretie, "Ninki ogokora imabwo? Kora bwango ondetere enyimbo yane." Inkairana bwango nenyimbo yaye. "Ninki ogosekere?" akamboria. Okoboria gokagera inkainyora buna nigo naichanete ase okomanya koria ase abisete amatoke.

Rituko rikobwatia ekero baba achete minto gokwania mama, inkaminyoka gochia nyomba mwaye korigereria amatoke aria naende. Inkanyore egesabo ekemo konyora giatobire. Intatabora ritoke erimo nakobisa eyanga yane ime. Inkakuneka egekabu keria naende nagosoka. Ingaeta isuku nyuma yenyomba eria inkariria. Nigo riarenge gwansa sana, ase obogima bwane konyora tindaria itoke rigwansa igo.

Rituko riria riarenge kobwatia, baba noo arenge mogondo oye akwaa ching'eni. Inkechobanesia na korigereria amatoke aria. Bono konyo ange onsi atobire. Ingasinywa gotiga kobogoria make, ingatabora amatoke ane. Ingasonsogoria ng'oora gochia ase omorangu, inkaigwa baba kagokora isiko. Inkanyara tu kobisa amatike aria eyanga yane ime nakomoetania gochia isiko.

Rituko riarenge kobwatia nigo riarenge rituko riechiro. Nigo baba arenge koira amatike aye echiro koonia. Tichieti koayerera kogenda mwaye ituko erio. Korende tinyareti komoina ngaki tambe.

Emarogoba eyio ekero narangeretiwe na mama, tata na magokoro, inkamanya ninki bandangereria. Obotuko obwo ekero naraire, inkamanya tinkoirorera koiba naende, ebe korwa ase magokoro gose onde bwensi.