Ayakar kolong adakar kosi ng'ichan lukaalak. Eding'iding'ae ewokio ng'akipi alochor.
Edaruuniyo sua akimuj na eyaunit najokotau.
Agoleneo ng'awiyei jiik kotere ng'ikokolak lu apetuna.
Apotu ng'ide lukaalak toisikis akisomare esukul.
Asubete ng'ide lupesur luuchik etich ang'awiyei ang'itunga toriamuneta ng'asiling'a.
Epasaate ng'isapa alokiding adakar, etiyaate luche etich ang'amanat ang'itung'a.
Arai na ekutunia ekuwam, kilelebun ng'akalakalia lokito ka ng'alarin.
Todung'udung'osi ng'achupae na eleleba wadaang ng'itung'a.
Apei kwaar towon aperech tong'opa ng'akipi.
Abu apakang tochunak ng'itung'a daang lokiriam adakar.
Tochunakin ng'itung'a kwap ekitoe loapolon topupokis.
Tonyou ng'esi tama, "Echamitae ng'oni daang esiriama ng'atameta eng'arakinotor."
Abu Juma-lo arai ng'ikaru ng'ikankauni-kirema alokwap ekitoe tama, "Apedori ayong eng'arak alowae alo akiteseg akwap."
Tama aberu apei, "Potu ng'aberu daang eng'arakinos akitauni akimuj anamanat."
Tama eche-kile enyouni kidiama, "Tobokut ng'ikiliok akare ang'akipi."
Eremasi sua daang aetoil atamasi, "Potu elokonyo eboyor yok!" Anyoun akwar ng'ina atotiakutu sua daang asubakin eboyor kosi.