Muhwana ni Mulongo ba menya mu hibuga ni saawe. Baali besunga ohuŋuumula. Si huba ti abaana abamasemero baali baja mu huŋuumula aye olw'ohuba baali baja huhyalira nguhwa waawe.

Muhwana ni Mulongo baali basangafu o'lwohuba baali baja huhyalira nguhwa. Ehiire ko buhye batiine, bategeha emigugu jaawe eji baali ni baja hutiina ni najo. Si baŋenyuha hwiro olw'ohuba owiire woosi baali baŋaya hu bija ohuba mu luŋuumulo.

Mu mawiiwi, batagiha olugendo lwawe era bagendera mu motoka ya saawe. Ba fuga baabita mu solo, mu solo ekambwe no mu ndimiro j'amajaani.

Ehiseera ni hyabitaŋo, abaana batagiha ohuŋenyuha olw'omudembo.

Saawe gabasisimusa ni benda ohwoleresa ewa nguhwa waawe. Baagaana nguhwa yaawe Namulwa naŋuumulira mu musaala.

Nguhwa gabakalibbusa mu nyumba era esangalo eri gaali ni n'alyo ng'olibonera hu hwemba n'amahina aga gaahina. Abejuhulu babe bamuŋambya ebirabo ebi baali ni bamuleteye ohuŋwa mu hibuga.

Nga Muhwana ni Mulongo batula mu nyumba, batagiha ohuŋiima epuluguti n'enyuni.

Baniina emisaala era bebbomba mu maaji g'enyanja.

Ni wahya, semwana w'abaana gafuga emotoka yiye gaagama mu hibuga.

Muhwana ni Mulongo ba yeeda nguhwa waawe emirimo eja ŋango. Bajanga amaaji era, batenya n'ekwi. Basolosanga amagi g'engoho era baaŋa eryani.

Lulala, mu mugamba Muhwana gaŋira eŋombe ja nguhwa wuwe ohwaya. Jaduluma jengira mu ndimiro ya muliranwa wawe. Omwene nimiro ganyiigira Muhwana luhulu lweene. Era gatisa tiisa ati gaali aja husigasa eŋombe olw'ohulya ebirime bibye. Ohuŋwa hu ludaalo olwo Muhwana gegenderesa ebigosi bitoola hu ŋombe nindi.

Lulala nga nindi abaana batiina mu hatale ni Nguhwa wawe. Gaali n'omudaala ohu gatundiranga eryani, sukaali ni sabbuuni. Muhwana ganyumirwanga luhulu lwene ohulomera abagusi omuŋendo gw'ebiitu. Mulongo nga aboŋanga ebibagulire.

Ni bahenanga ohutunda nga behala banywa caayi. Nga bahena bayeeda nguhwa waawe ohubala ebbesa eji bafunire.

Ne oluŋuumulo sirwalwa huŋwaho ng'abaana bagamayo mu hibuga. Nguhwa gaŋa Muhwana e kofiira nga aŋa Mulongo esweta. Gabategehera n'ebiryo ebyohuliira mu ngira ni batiina mu lugendo.

Saawe ni gaberuhira, sibenda hu tiina ni naye. Abaana begayirira Nguhwa wawe atiine nabo. Gamwenya galoma ati, "Ndi musaahulu sisobola mu hibuga nja husigala mbalinde ohwola nindi olu muli galuha."

Muhwana ni Mulongo bamugwa mu hifuba ni bamuseebula.