Kwa toropo-kgolong e e pheteselang ya Nairobi, kgakala le botshelo jo bo bothito jwa kwa gae, go ne go dula basimane ba kwa mebileng. Ba ne ba amogela letsatsi le lengwe le lengwe jaaka le ne le tlhaba. Moso mongwe basimane ba ne ba mena meseme ya bona fa ba tsoga. Ba ne ba robala mo fatshe mo samenteng se se maruru. Ba ne ba gotsa molelo ka matlakala go leleka serame. Mo setlhopeng se sa basimane, go ne go nale mongwe a bidiwa Magozwe. O ne a le monnye mo go bone.

Batsadi ba ga Magozwe ba tlhokafetse a na le dingwaga tse tlhano fela. O ne a ya go dula le malomagwe. Monna yo o ne a sa kgathalele ngwana. O ne a sa fe Magozwe dijo sentle. O ne a mo berekisa jaaka lekgoba.

Fa Magozwe a ne a ngongorega kgotsa a botsa dipotso, o ne a itewa botlhoko. Fa Magozwe a ne a botsa gore a ka ya sekolong, malomagwe o ne a mo itaya mme a re, "O sematla se segolo gore o ka ithuta sengwe." Morago ga dingwaga tse tharo tsa tshotlakako e, Magozwe o ne a tshaba. O ne a simolola go dula kwa mebileng.

Botshelo jwa mebila bo ne bo le thata mme go ne go le thata mo basimaneng go bona fela sa go ja. Ka matsatsi mangwe ba ne ba tshwarwa, matsatsi mangwe ba ne ba itewa. Fa ba ne ba lwala, go ne go se kwa ba ka bonang thuso teng. Setlhopa se sa basimane se ne se tshela ka madinyana a ba neng ba a bona ka go kopa, le go rekisa dipolasetiki le dilo tse di ka dirisiwang gape. Botshelo bo ne bo le bokete thata ka ntlha ya dintwa magareng ga basimane ba ba neng ba batla go laola dikarolo dingwe tsa toropo-kgolo.

Ka letsatsi lengwe fa Magozwe a ntse a batlana le dijo mo matlakaleng, o ne a bona buka e e gagogileng ya dipadi. O ne a e ntsha leswe mme a e tsenya mo kgetsaneng ya gagwe. Letsatsi le lengwe le lengwe morago ga moo, o ne a ntsha buka e mme a lebelela ditshwantsho. O ne a sa itse go buisa mafoko.

Ditshwantsho tsa padi e, di ne di bua ka ga mosimane yo o neng a gola go nna mofofisi wa sefofane. Magozwe o ne ka gale a lora gonna mofofisi wa sefofane. Ka matsatsi a mangwe, o ne a ipona e le ena mosimane yo o mo pading.

Go ne go le maruru thata mme Magozwe o ne a eme mo thoko ga tsela a kopa. Monna mongwe a tla kwa go ena. "Dumela, ke nna Tomase. Ke dira gaufi le fano, kwa tulong e o ka bonang dijo teng," ga rialo monna yo. A supa ntlo e e serolwane e e nang le marulelo a botala jwa legodimo. "Ke tshepa gore o tla ya moo go ya go batla dijo?" monna yo a botsa. "Ka gongwe," a bua a tsamaya.

Fa dikgwedi di ntse di tsamaya, basimane ba ne ba tlwaetse go bona Tomase moo. O ne a rata go bua le batho, bogolo-segolo batho ba ba dulang mo mebileng. Tomase o ne a reetsa dipadi tsa matshelo a batho. O ne a a le pelo-telele, ebile a le maitseo. Basimane ba bangwe ba ne ba simolola go ya kwa ntlong e e serolwane go ya go batla dijo tsa motshegare.

Magozwe o ne a dutse mo thoko ga tsela a lebeletse buka ya ditshwantsho fa Tomase a tla go dula mo thoko ga gagwe. "Padi e e bua ka eng?" ga botsa Tomase. "Ke ka mosimane yo o nnang mofofisi wa sefofane," ga araba Magozwe. "Leina la mosimane ke mang?" ga botsa Tomase. "Ga ke itse, ga ke itse go buisa," ga rialo Magozwe a buela kwa tlase.

Fa ba kopana, Magozwe o ne a simolola go bolelela Tomase ka ga botshelo jwa gagwe. E ne ele ka ga malomagwe le gore goreng a tshabile. Tomase o ne a sa bue thata, ebile o ne a sa bolelele Magozwe gore a dire eng, mme o ne a reetsa ka tlhoafalo ka dinako tsotlhe. Ka dinako tse dingwe ba ne ba bua fa ba ntse ba ja kwa ntlong ya marulelo a botala jwa legodimo.

Go isa kwa matsatsing a botsalo jwa ga Magozwe jwa dingwaga tse lesome, Tomase o ne a fa Magozwe buka. E ne e le padi ka ga mosimane wa kwa magaeng yo o golang go nna setshameki se se itsegeng sa kgwele ya dinao. Tomase o ne a buisetsa Magozwe padi eo makgetho a mantsi, go fitlhela letsatsi lengwe a re, "Ke akanya gore ke nako ya gore o tsene sekolo o ithute go buisa. Wena o akanya eng?"  Tomase a tlhalosa gore o itse tulo e bana ba ka dulang teng le go ya sekolong.

Magozwe o ne a akanya ka tulo e ntšhwa e, le ka go ya sekolong. Ka gongwe malomagwe o ne a bua nnete mme ke sematla fela se se sa kgoneng go ithuta sepe? Fa a ka fitlha a itewa kwa tulong e ntšhwa? O ne a tshogile. "Ka gongwe go botoka ke nna gona mo mebileng," a akanya.

O ne a bolelela Tomase letshogo la gagwe. Ka dinako tsotlhe Tomase o ne a tshepisa mosimane gore botshelo bo tla tokafala kwa tulong e ntšhwa.

Jaanong Magozwe a ya go dula kwa phaposing ya ntlo ya marulelo a a serolwane. O ne a dula le basimane ba bangwe ba babedi. Bana ba ba neng ba dula kwa ba ne ba le lesome. Gammogo le mmangwane Puleng le monna wa gagwe, dintšwa tse tharo, katse le podi ya motsofe.

Magozwe o ne a simolola sekolo mme go ne go le boima. O ne a saletse kwa morago thata. Ka dinako tse dingwe o ne a batla go ineela. Mme fela a akanya ka mofofisi wa sefofane le motshameki wa kgwele ya dinao mo dipading. Jaaka bona, o ne a seka a ineela.

Magozwe o ne a dutse mo jarateng kwa ntlong ya marulelo a a serolwane, a buisa buka ya dipadi go tswa kwa sekolong. Tomase o ne a tla go dula mo thoko ga gagwe. "Padi e e bua ka eng?" ga botsa Tomase. "Ke ka mosimane yo o nnang morutabana," ga araba Magozwe. "Leina la mosimane ke mang?" ga botsa Tomase. "Leina la gagwe ke Magozwe," ga rialo Magozwe ka monyebo.