Document

Shiŋgoòy: Kimfèr Ke Wangari Mathay

Nicola Rijsdijk

Maya Marshak

Yì-iì dzə̀ é ntèʼ yìmòʼ e wǔn Gwan Kenya, e mbìv wòŋ woó Afrika, fo shùy yii tó, shiwán shee wiíy shímóʼ shí wáa rəsí a du kwáʼ a lìm lím wùn yè wov. Yír rə́-əə̀ dzə̀ Waŋgari.

Waŋgari yòʼ-oò koŋ dzə́ yee fó laʼ. Wù nén lo, wù dù aáwune sum fo á lìm vifá ve yi, e lì nyùy rə e kàʼtí nsay sho. Káʼtí nsay bèy, wù nèn lì ŋgoòy se vifa siŋeérín, e wày é nsay, a yì lumè.

Wúné-eè lo wú bòŋ wun e shaàsìn a dzə é ghan se shùy nəə̀n ne. Ndzə-əə̀ keʼ sə́n, a wù yòʼ kfə̀n yú fó a yen ŋgoòy se vifa siy, Waŋgari nèn kìíy ji kì sì á ghán se wun wáa dù á fo laʼ.

Wù lóo dù, wù wàa tòʼrì dzə́ə sí tóʼrin e kwaʼ, e kfə̀n a tum ndzə́v sí.

Waŋgari dzə̀ wán, a wù-uù kér vifií féyì, nèn kér shií fo dù ŋwàʼ. Yii bèy, a yè wov wùn tàr wov koŋ kév ji wù wáa dzə a fo laʼ a sə áwune.

Wù wìy mèé kiyá saàmbà, mbìy rə yee lumèn nèn lòn tàr wov wùn yè wov ji á maʼti é wù du á ŋwàʼ.

Waŋgari nèn dù a yeʼéy ŋwàʼ bèy, a kòŋ kinyo kee shó. Wù-uù yoŋ aŋwàʼ anín, yoŋ woo shó, wù kù koò kifá fo fo.

Wù nèn a yeʼéy ŋwàʼ kijuŋ feyi. Á nèn lò e jàŋ wun ji wù wiy a ŋwàʼ lèn a dzə̀ e vimbàŋ vi wòŋ, e Amerika.

Wúné nèn a bòŋ wun feyì, wù wáa ker shií ji wun bónén e kìíy a mo ndzə dzəə̀n.

Wangari-iì dù é yùnèveésítì woó Amerika, e yèʼéy vinyo ve fíy vi fó vinín. Wù-uù yèʼéy kùm vikwiíy, à mo ví yii kúyí. Wù wìy lò, e kuùmé ghán se wù-uù kúyí, mo wùn aàfə́r və́-əə̀ rə́si tùŋ visəə́rí é sar se vici é kòv seé Kenya, kóv, a sí dzə̀ ben sijuŋ.

Mo wù yéʼey ŋwàʼ du fo mbìy, koŋ ye wù-uù kér fo wír veé Kenyàa nèn a dzə̀sì wún dzə́sin. Wù nèn a tàʼ ji bo wír vəə́ kì dzə́ a dzə́ ye juŋe, kfə̀n ghánen a kicaársín. Mo wù kù yéʼey ŋwàʼ du fo mbìƴ, dzə̀ mo wù kuúme bám wo dzəə̀n woŋ wóv woo Afrika.

Wù wìy màysì ŋwàʼ və́, e nèn kfə̀n é Kenya. Wù wáa kfən bèy, a kitúm kfə́ kí sì kifá ke sən kí, aá lím ne mboʼ se sum fó sigháʼán.

A meŋkaʼ mè yòʼ dzə̀ me dzə̀ wiíy tòn və́y ji wun naá kifá sho. Kitan ki-iì dzə̀ e wíri wùn, a wóné toóŋé jíŋ.

Waŋgari nèn kìíy kinyo kée yiì. Wù-uù yèʼéy vikìy mo dzə̀ á lì mbìy se vici e bìy. Vikìy yiì bèy, e nèn a ker vicí vé a fiìnè. Fiinè, á nèn lì mbàm, a leéy kfəə́ sév shó. Wúné nén a bòŋ vikìy vin feyì, bìʼ fo Waŋgari-iì yiìn áwune waá koo bèn à luumèn, e kfə̀n a yen sa ji áwune dzə̀ á antav.

Vicí viy vi wìy lò, e kùy, e nèn fèr kóv sí, ndzə́v sí nèn siì kèʼ a leŋ. Sáʼka wo Waŋgari woo kùm vicí və̀n nèn sàmèr wún wóŋ Afrika e dzə̀m. Lèn wáa dzə, a vicí ví sì ansə̀kì ansə̀kì vee ji ví lò fo ŋgoòy ye Waŋgari-iì wìyìn shó.

Waŋgari-iì kpù e kiya kee nshòv mòʼón e ghvə̀m aànsə̀kìi abaà. Yii bèy, a vèsən lo, á kù a kuumé wun ghán sidzə̀m se vèsən yenen kicí ke juŋ ki.

You are free to download, copy, translate or adapt this story and use the illustrations as long as you attribute in the following way:

Shiŋgoòy: Kimfèr Ke Wangari Mathay

Author - Nicola Rijsdijk
Translation - Beatrice Tafon Takeh, Mbinkar Emmanuel Keelen
Illustration - Maya Marshak
Language - Lámnsoʼ
Level - First paragraphs

© Nicola Rijsdijk, Maya Marshak, Tarryn-Anne Anderson, Bookdash.org and African Storybook Initiative 2015
Creative Commons: Attribution 4.0
Source www.africanstorybook.org
Original source www.bookdash.org