Yì-iì dzə̀ é ntèʼ yìmòʼ e wǔn Gwan Kenya, e mbìv wòŋ woó Afrika, fo shùy yii tó, shiwán shee wiíy shímóʼ shí wáa rəsí a du kwáʼ a lìm lím wùn yè wov. Yír rə́-əə̀ dzə̀ Waŋgari.
Waŋgari yòʼ-oò koŋ dzə́ yee fó laʼ. Wù nén lo, wù dù aáwune sum fo á lìm vifá ve yi, e lì nyùy rə e kàʼtí nsay sho. Káʼtí nsay bèy, wù nèn lì ŋgoòy se vifa siŋeérín, e wày é nsay, a yì lumè.
Wúné-eè lo wú bòŋ wun e shaàsìn a dzə é ghan se shùy nəə̀n ne. Ndzə-əə̀ keʼ sə́n, a wù yòʼ kfə̀n yú fó a yen ŋgoòy se vifa siy, Waŋgari nèn kìíy ji kì sì á ghán se wun wáa dù á fo laʼ.
Wù lóo dù, wù wàa tòʼrì dzə́ə sí tóʼrin e kwaʼ, e kfə̀n a tum ndzə́v sí.
Waŋgari dzə̀ wán, a wù-uù kér vifií féyì, nèn kér shií fo dù ŋwàʼ. Yii bèy, a yè wov wùn tàr wov koŋ kév ji wù wáa dzə a fo laʼ a sə áwune.
Wù wìy mèé kiyá saàmbà, mbìy rə yee lumèn nèn lòn tàr wov wùn yè wov ji á maʼti é wù du á ŋwàʼ.
Waŋgari nèn dù a yeʼéy ŋwàʼ bèy, a kòŋ kinyo kee shó. Wù-uù yoŋ aŋwàʼ anín, yoŋ woo shó, wù kù koò kifá fo fo.
Wù nèn a yeʼéy ŋwàʼ kijuŋ feyi. Á nèn lò e jàŋ wun ji wù wiy a ŋwàʼ lèn a dzə̀ e vimbàŋ vi wòŋ, e Amerika.
Wúné nèn a bòŋ wun feyì, wù wáa ker shií ji wun bónén e kìíy a mo ndzə dzəə̀n.
Wangari-iì dù é yùnèveésítì woó Amerika, e yèʼéy vinyo ve fíy vi fó vinín. Wù-uù yèʼéy kùm vikwiíy, à mo ví yii kúyí. Wù wìy lò, e kuùmé ghán se wù-uù kúyí, mo wùn aàfə́r və́-əə̀ rə́si tùŋ visəə́rí é sar se vici é kòv seé Kenya, kóv, a sí dzə̀ ben sijuŋ.
Mo wù yéʼey ŋwàʼ du fo mbìy, koŋ ye wù-uù kér fo wír veé Kenyàa nèn a dzə̀sì wún dzə́sin. Wù nèn a tàʼ ji bo wír vəə́ kì dzə́ a dzə́ ye juŋe, kfə̀n ghánen a kicaársín. Mo wù kù yéʼey ŋwàʼ du fo mbìƴ, dzə̀ mo wù kuúme bám wo dzəə̀n woŋ wóv woo Afrika.
Wù wìy màysì ŋwàʼ və́, e nèn kfə̀n é Kenya. Wù wáa kfən bèy, a kitúm kfə́ kí sì kifá ke sən kí, aá lím ne mboʼ se sum fó sigháʼán.
A meŋkaʼ mè yòʼ dzə̀ me dzə̀ wiíy tòn və́y ji wun naá kifá sho. Kitan ki-iì dzə̀ e wíri wùn, a wóné toóŋé jíŋ.
Waŋgari nèn kìíy kinyo kée yiì. Wù-uù yèʼéy vikìy mo dzə̀ á lì mbìy se vici e bìy. Vikìy yiì bèy, e nèn a ker vicí vé a fiìnè. Fiinè, á nèn lì mbàm, a leéy kfəə́ sév shó. Wúné nén a bòŋ vikìy vin feyì, bìʼ fo Waŋgari-iì yiìn áwune waá koo bèn à luumèn, e kfə̀n a yen sa ji áwune dzə̀ á antav.
Vicí viy vi wìy lò, e kùy, e nèn fèr kóv sí, ndzə́v sí nèn siì kèʼ a leŋ. Sáʼka wo Waŋgari woo kùm vicí və̀n nèn sàmèr wún wóŋ Afrika e dzə̀m. Lèn wáa dzə, a vicí ví sì ansə̀kì ansə̀kì vee ji ví lò fo ŋgoòy ye Waŋgari-iì wìyìn shó.
Vicí viy vi wìy lò, e kùy, e nèn fèr kóv sí, ndzə́v sí nèn siì kèʼ a leŋ. Sáʼka wo Waŋgari woo kùm vicí və̀n nèn sàmèr wún wóŋ Afrika e dzə̀m. Lèn wáa dzə, a vicí ví sì ansə̀kì ansə̀kì vee ji ví lò fo ŋgoòy ye Waŋgari-iì wìyìn shó.
Waŋgari-iì kpù e kiya kee nshòv mòʼón e ghvə̀m aànsə̀kìi abaà. Yii bèy, a vèsən lo, á kù a kuumé wun ghán sidzə̀m se vèsən yenen kicí ke juŋ ki.